約拿書 2 - 現代台語譯本漢字版(TTVH)-闽南语

約拿的祈禱

1 約拿佇魚的腹肚內對上主 — 伊的上帝祈禱，講：

2我佇危急的時求叫上主，

伊有應我；

我對陰間上深的所在哀叫，

你有聽著。

3你給我㧒落深海，到海底；

大水圍我，你的波浪、你的大湧蓋我。

4我想：「你對你的面前給我趕走，

我欲按怎才會當閣看著你的聖殿？」

5我互水激甲欲無命；

深淵圍困我；

海草纏牢我的頭殼。

6我沉落去到山的根基；

地的門閂永遠給我閂啲；

毋拘，上主 — 我的上帝，

你有救我的性命脫離死亡。

7我的性命強欲無去的時，

我想起上主；

我的祈禱進入你的聖殿，

到佇你的面前。

8所有擒牢無路用的偶像的人，

棄拺𪜶對你的忠誠。

9總是我欲用感恩的聲做祭獻互你，

謝我下的願。

拯救是對上主來！

10上主就命令彼尾魚，給約拿吐佇陸地。