1耶穌閣用譬喻給𪜶講：
2「天國通譬喻做一個國王給伊的子辦婚宴。
3伊差僕人去叫所請的人客來赴婚宴，不過𪜶毋來。
4國王閣差其他的僕人，給𪜶講：『恁去給許個受邀請的人講，我的宴席已經準備好勢；我的牛及肥的牛仔子嘛已經刣，一切攏準備好勢啦，請恁來赴婚宴。』
5毋拘許個受邀請的人無看做要緊，做𪜶去；一個去園裡做工；一個去做生理；
6其他的掠伊的僕人，給𪜶凌辱，續給𪜶刣死。
7國王非常受氣，就派兵去剿滅許個兇手，放火燒𪜶的城。
8然後伊給僕人講：『婚宴準備好啦，毋拘所邀請的攏不配互咱請。
9所以，恁去街路口，抵著的人攏給𪜶請來赴婚宴。』
10許個僕人就出去街裡，抵著的無論好人歹人攏給𪜶請來；婚宴的所在人客就坐到滿滿。
11「國王入來看許個人客，看著佇遐有一個人無穿婚宴的禮服，
12就給伊問：『朋友啊，你入來遮哪無穿婚宴的禮服？』彼個人攏無應。
13國王就對差用的講：『腳手給縛起來，給伊㧒出去外面烏暗的所在。佇遐，伊會啼哭，咬牙切齒。』
14「受呼召的真多，毋拘受揀選的真少。」
納稅的問題(可 12.13-17；路 20.20-26)15法利賽派的人出去，做夥參詳欲按怎掠耶穌的話縫通給伊陷害。
16𪜶差家己的門徒及希律黨的人去耶穌遐，對伊講：「老師，阮知你真誠實，照實將上帝的道理教示人，無論什麼款人，你對待𪜶攏無差別。
17納稅互羅馬皇帝凱撒有合律法無？請給阮講你的想法啥款。」
18耶穌知影𪜶的惡意，就對𪜶講：「假好的人，是按怎欲給我試探？
19提一個納稅的銀幣互我看。」
𪜶就提一個銀幣互伊。
20耶穌問𪜶：「這是什麼人的像，什麼人的字號？」
21𪜶講：「凱撒的。」
耶穌就給𪜶講：「按呢，凱撒的物互凱撒；上帝的物互上帝。」
22𪜶聽了真著驚，就離開。
死人閣活的問題(可 12.18-27；路 20.27-40)23像彼日，一寡主張無閣活的撒都該派的人來耶穌遐，問伊講：
24「老師，摩西講：『有人無生子就死去，小弟著娶兄嫂替兄哥傳宗接代。』
25以前阮遮曾有七個兄弟；上大的結婚，無留後代就死去，放某互小弟。
26第二的，第三的，到第七的攏像款。
27𪜶攏死了後，彼個婦仁人嘛死去。
28按呢，閣活的時，此個婦仁人是此七個人中間叨一個的某？因為𪜶攏曾娶伊。」
29耶穌應講：「恁毋著。恁毋識聖經，嘛毋識上帝的權能。
30因為閣活的時，𪜶及天頂的天使像款，無嫁無娶。
31關係死人閣活的事，恁豈無讀著上帝對恁講的話：
32『我就是亞伯拉罕的上帝，以撒的上帝，雅各的上帝』？伊毋是死人的上帝，是活人的上帝。」
33群眾一下聽著，對伊的教示感覺真著驚。
上大的誡命(可 12.28-34；路 10.25-28)34法利賽派的人聽著耶穌互撒都該派的人無話通應，就聚集做夥。
35其中有一個律法教師來問一個問題，欲給伊試探，講：
36「老師，摩西的律法叨一條是上大的誡命？」
37耶穌應講：「你著全心、全情、全意疼主 — 你的上帝。
38這是上大閣第一的誡命。
39第二的嘛像款：著疼厝邊親像疼家己。
40全部律法及先知的教示攏用此兩條做根據。」
關係大闢後代的問題(可 12.35-37；路 20.41-44)41法利賽派的人聚集的時，耶穌問𪜶：
42「關係基督，伊是什麼人的後代，恁想按怎？」
𪜶講：「伊是大闢的後代。」
43耶穌對𪜶講：「若是按呢，是按怎大闢受聖神感動的時稱基督做主，講：
44主給我的主講：
你坐我的正旁，
到我互你的對敵屈服佇你腳下。
45既然大闢稱呼基督做『主』，基督哪會是大闢的後代？」
46無人會當回答半句。對彼日起，無人敢閣給伊問什麼問題。
Who We AreWhat We EelieveWhat We Do
2025 by iamachristian.org,Inc All rights reserved.
