路加福音 13 - 現代台語譯本漢字版(TTVH)-闽南语

無悔改就滅亡

1抵彼個時，有幾若個人來，對耶穌講起彼拉多刣死佇祭壇獻祭的加利利人的代誌。

2耶穌應講：「因為諸個加利利人受此款的災難，恁就想講𪜶比其他的加利利人有犯較重的罪是無？

3我給恁講，毋是，恁若無悔改，攏會親像𪜶按呢滅亡。

4豈採恁嘛想講，西羅亞的塔倒落去的時，互伊硩死彼十八個人比住佇耶路撒冷攏總的人有犯較重的罪。

5我給恁講，毋是，恁若無悔改，攏會親像𪜶按呢滅亡。」

無結果子的無花果樹

6後來，耶穌給𪜶講此個譬喻。伊講：「有一個人佇伊的葡萄園種一欉無花果樹。伊來彼欉樹尋果子，毋拘尋攏無。

7伊就對顧園的人講：『你看，我連續三年來此欉無花果樹遮尋果子，尋攏無。給伊剉起來！哪著留啲鎮所在？』

8彼個顧園的應講：『主人啊，閣給伊留一年，我來掘四邊的土，閣落肥；

9明年若有結果子就好，若無，才給伊剉起來。』」

佇安歇日醫好身軀彎曲的婦仁人

10有一個安歇日，耶穌佇一個會堂內啲教示人。

11有一個婦仁人互邪神附身，破病十八年，身軀彎曲伸𣍐直。

12耶穌一下看著，就叫伊來，給伊講：「婦仁人，你的病已經好啦！」

13耶穌用雙手給伊按；伊的身軀隨時伸直，就歸榮光互上帝。

14不過會堂的主管，因為耶穌佇安歇日給人醫病，就真受氣，對眾人講：「咱有六日通做工，欲醫病著佇此中間來醫，毋應該佇安歇日。」

15主應講：「假好的人，恁逐個人豈無佇安歇日對椆裡解牛抑是驢，牽去飲水？

16此個婦仁人是亞伯拉罕的子孫，已經受撒旦束縛十八年久，佇安歇日給伊解放豈毋應該？」

17耶穌講諸個話的時，伊的對敵攏感覺見笑；所有的群眾因為伊所做一切奇妙的代誌攏真歡喜。

芥菜籽的譬喻(太 13.31-32；可 4.30-32)

18耶穌講：「上帝國親像什麼？我著用什麼來比並？

19上帝國親像一粒芥菜籽，有人提去撒佇家己的園裡。芥菜漸漸大欉，成做樹，空中的鳥仔嘛佇樹枝做巢。」

酵母的譬喻(太 13.33)

20耶穌閣講：「我欲用什麼來比並上帝國？

21上帝國親像酵母，有一個婦仁人提去濫佇三斗麵粉做夥抄，最後歸個攏發起來。」

狹的門(太 7.13-14, 21-23)

22耶穌經過城市及庄腳去耶路撒冷，沿路教示人。

23有人問伊講：「主啊，會得著救的人真少是無？」

耶穌給𪜶講：

24「著盡力對狹的門入去。我給恁講，有真多人想欲入去亦𣍐當入。

25主人起來關門了後，恁才徛佇門外拍門，講：『先生，請給阮開門！』伊會應講：『我毋知恁是叨位來的人。』

26彼時，恁會講：『阮曾及你做夥飲食；你嘛曾佇阮的街路教示。』

27毋拘伊會講：『我給恁講，我毋知恁是叨位來的人。恁諸個作歹的人攏離開我！』

28恁看著亞伯拉罕、以撒、雅各，及所有的先知佇上帝國的內面，家己卻受趕出去外面，彼時恁會佇遐啼哭，咬牙切齒。

29人會對東西南北來，佇上帝國坐桌參加宴會。

30按呢，上路尾的會做第一；第一的會做上路尾。」

為著耶路撒冷悲傷(太 23.37-39)

31抵彼個時，有一寡法利賽派的人倚來給耶穌講：「你著離開遮去別個所在，因為希律想欲刣你。」

32耶穌給𪜶講：「恁去給彼隻狐狸講：『你看，今仔日、明仔載我趕鬼，醫病，第三日完成我的工作。

33雖然是按呢，今仔日、明仔載，及後日，我一定著繼續行我的路，因為先知無應該佇耶路撒冷以外的所在互人刣死。』

34「耶路撒冷啊，耶路撒冷啊，你刣死先知，閣用石頭抌死上帝差來你遮的使者。我偌多遍愛欲聚集你的子兒，親像雞母聚集雞仔子給𪜶攔佇翼股下，恁攏無愛。

35恁看，恁的厝會荒廢！我給恁講，對今以後恁絕對看𣍐著我，直到恁講『奉主的名來彼位應該受稱讚！』」