以西結書 42 - 現代台語譯本漢字版(TTVH)-闽南语

聖殿附近的房間

1彼個人導我向北行，來到外埕。伊閣導我入去一排厝；諸個厝一面向聖殿的空地，一面向北旁的房間。

2此排厝長五十公尺，闊二十五公尺，向北此旁有門。

3此排厝一面向十公尺闊的內埕，一面向有鋪石板的外埕。此排厝有三層，逐層的走廊相連。

4此排厝的門攏向北，頭前有通路，闊五公尺，長五十公尺。

5因為走廊佔一寡空間，所以三樓的房間比二樓及一樓的房間較狹。

6此排厝有三層，因為無親像外埕的厝用柱仔托啲，所以，三樓的房間比二樓及一樓的房間較狹。

7佇外埕，此排厝的頭前，有一堵牆及厝平行，長二十五公尺。

8向外埕的房間，長二十五公尺，向聖殿的房間長五十公尺。

9此排厝下面的東旁，有一個門通到外埕；

10彼個通路的闊度及外埕的牆像款。

聖殿的南旁嘛有一排厝；諸個厝一面向聖殿的空地，一面向南旁的厝。

11此排厝的頭前有一條通路，及北旁彼排厝仝款；房間的長、闊、款式，及出入口攏及北旁的厝像款。

12南旁許個房間的下面，及北旁的厝仝款，佇通路的開始有門通出入。

13彼個人給我講：「南旁及北旁面對空地的房間，攏分別作聖；佇上主面前服事的祭司佇遐食至聖的物；祭司佇遮囥至聖的祭物，就是素祭、贖罪祭，及賠罪祭的祭物。

14祭司入去聖所了後，𣍐用得直接出來外埕，著將侍奉上主的時穿的禮服留佇遐的房間，因為諸個禮服是聖的；𪜶著穿別種衫，才通親近會眾。」

聖殿附近的寸尺

15彼個人量聖殿內部的寸尺了後，就導我對東門出去，去量聖殿的四周圍。

16伊用蘆竹的量尺量，東旁長兩百五十公尺。

17-19伊閣踅去北旁、南旁、西旁，用蘆竹的量尺量，每一旁長攏是兩百五十公尺。

20按呢，伊量聖殿的四周圍，長、闊各兩百五十公尺；四周圍攏有圍牆，隔開聖及俗的所在。