彌迦書 5 - 現代台語譯本漢字版(TTVH)-闽南语

1 錫安的子民，著聚集成做軍隊。

咱受圍困攻擊啦；

𪜶用棍啲摃以色列領袖的嘴䩃。

對伯利恆來的統治者

2 以法他地區的伯利恆啊，

你佇猶大宗族中雖然微細，

毋拘有一位會對你遐出來，

為我治理以色列；

伊的根源對古早，對上起頭就有。

3所以，上主欲將伊的子民交互對敵，

直到彼個啲催陣的婦仁人給子生出來。

彼時，許個受掠猶活啲的同胞會倒來以色列遐。

4伊欲靠上主的氣力徛出來，

奉上主 — 伊的上帝的名的威嚴，

牧養伊的羊群，

互𪜶安然徛起；

伊會佇全地受尊做大。

5此位會互咱四境平安。

解救及刑罰

亞述侵犯咱的國土，攻擊咱的堡壘的時，

咱欲指派七個牧者，八個首領反擊。

6𪜶會用劍治理亞述地，

用拔出來的刀統治寧錄地。

亞述侵犯咱的地，踐踏咱的國土的時，

此位會解救咱。

7 以色列所賰的子民佇萬民中，

會親像上主降落的露水，

親像潤澤草的甘霖；

𪜶毋免倚靠人，

毋免期待世間人。

8 以色列賰落來的子民佇萬國萬民中，

會親像樹林內百獸中的獅，

親像羊群中間少壯的獅，

𪜶經過的時，會踐踏，拆裂，無人會當解救。

9恁會贏過對敵，

消滅恁所有的敵人。

10上主講：佇彼日，

我欲對恁中間除去恁的戰馬，

毀壞恁的戰車。

11我欲毀壞恁國內的城市，

拆毀恁所有的堡壘。

12我欲除去恁手啲弄的邪術，

佇恁遐無閣有卜卦的。

13我欲對恁中間除滅雕刻的偶像及石柱像；

恁就無閣跪拜家己的手造的偶像。

14我欲對恁中間拔出亞舍拉女神的柱像，

閣毀滅恁的城市。

15我嘛欲發大受氣，

報應無順趁的列國。