詩篇 72 - 現代台語譯本漢字版(TTVH)-闽南语

所羅門的詩。為君王祈禱

1上帝啊，求你將你公正的判斷賜互王；

求你將你的公義賜互王的子，

2互伊會照公義審判你的子民，

照公正判斷屬你困苦受壓制的人。

3願大山帶和平互伊的百姓，

願小山互𪜶享受繁榮。

4伊會替百姓中困苦的人申冤；

伊會解救散赤人，

會拍碎壓迫者。

5願𪜶敬畏你日久月深，

直到萬世代。

6願王親像雨水落佇草割了的園，

親像及時的雨水潤澤土地。

7佇伊坐位的日子義人會興旺，

及月平久享受大和平。

8伊會掌權對此個海到彼個海，

對大河直到地極。

9住佇曠野的人會跪落佇伊面前；

伊的對敵會完全降服。

10 他施及海島的列王來進貢；

示巴及西巴的王來獻禮物。

11願列王攏仆落拜伊，

萬國攏服事伊。

12因為散赤人求叫的時，伊會救𪜶；

困苦無依倚的人，伊嘛會救𪜶。

13伊會憐憫困苦散赤的人；

伊會拯救困苦人的性命。

14伊會救贖𪜶脫離壓迫及強暴；

伊看𪜶的性命做寶貝。

15願王萬歲！

願伊接受示巴進貢的金。

願百姓時常為伊祈禱，

歸日祝福伊無停。

16願此個土地五穀豐收，

滿山坪有麥穗，

親像黎巴嫩的樹林赫呢旺。

願城內，人親像地上的草茂盛興旺。

17願伊的名留到永遠，

親像日頭久長流傳。

人會因為伊得著福氣；

萬國會稱伊有福氣。

18至高上主 — 以色列的上帝，

只有伊行奇異的事，應該受稱讚。

19願伊榮耀的名永遠受稱讚；

願伊的榮耀充滿全地。

阿們！阿們！

20 耶西的子大闢的祈禱到遮結束。