詩篇 14 - 現代台語譯本漢字版(TTVH)-闽南语

大闢的詩，交互聖樂長。人的邪惡(詩 53)

1戇人心內講：「無上帝！」

𪜶攏腐敗，做可惡的代誌，

無甲一個做好。

2上主對天俯落來看世間人，

欲看有明理，有尋求上帝的人抑無。

3𪜶攏行迷路，平平變做污穢；

無人做好，連一個都無。

4做歹的人豈攏毋知？

𪜶吞食我的子民親像啲食飯；

𪜶無求叫上主。

5做歹的人會大驚惶；

因為上帝佇義人的中間。

6散赤人的計劃，恁互𪜶失敗，

毋拘上主是𪜶的避難所。

7願以色列的拯救對錫安出！

願上主導伊受掠的子民倒轉來！

彼時，以色列會歡喜，

雅各會快樂！