1按呢許個及基督耶穌結連的人就無受定罪。
2因為通過基督耶穌，彼個賜活命的聖神的法則已經有解放咱脫離罪及死的法則。
3因為人的本性軟弱，律法做𣍐到的，上帝有做成：伊差家己的子取及人仝款會犯罪的本性，宣判人本性的罪做有罪，來處理罪。
4上帝按呢做，是欲互律法正當的要求會當實現佇咱諸個無照本性，是照聖神的引導啲生活的人。
5因為順趁本性的人意向本性的事；毋拘順趁聖神的人意向聖神的事。
6意向本性，結果是死；意向聖神，會得著活命及和睦。
7按呢，意向本性是抵敵上帝，因為無順服上帝的律法；其實嘛無法度順服。
8順服本性的人𣍐當互上帝歡喜。
9既然上帝的神有𫢶佇恁內面，恁就毋是屬本性，是屬聖神。人若無基督的神就無屬基督。
10基督若𫢶佇恁內面，雖然恁的身軀因為罪死，上帝的神會互恁活，因為恁已經及上帝有合宜的關係。
11上帝的神有互耶穌對死人中閣活；此個神若𫢶佇恁內面，此位互基督對死人中閣活的上帝，會通過𫢶佇恁內面的聖神，互恁會死的身軀得著活命。
12兄弟姊妹，按呢看，咱有欠債，不過毋是欠本性的債趁本性啲活。
13恁若趁本性活會致到死；恁若靠聖神除滅肉慾的行為就會活。
14互上帝的神引導的人攏是上帝的子兒。
15因為恁對上帝領受的聖神毋是欲互恁閣倒轉去作奴隸，猶生活佇驚惶中；恁領受的聖神是欲互恁成做上帝的子兒，靠此位聖神咱通大聲叫：「阿爸，父啊！」
16聖神本身及咱的神做夥作證，講咱是上帝的子兒。
17既然咱是子兒，就是繼承人，是上帝的繼承人，及基督平平作繼承人。既然咱及基督同受苦，是欲互咱嘛及伊同受榮光。
將來的榮光18我想，現今此個時的苦難及將來啲欲對咱顯現的榮光𣍐比得。
19被造物迫切啲聽候上帝眾子兒的顯現。
20因為被造物𣍐當達到受造的目的，毋是出佇𪜶的本意，是上帝的旨意。不過被造物猶啲向望，
21有一日𪜶本身嘛會受解放來脫離會敗壞的拘束，通及上帝的子兒分享榮光的自由。
22咱知，所有被造物到現在猶做夥啲痛苦哀叫，做夥經驗催陣的苦痛。
23毋若被造物，連咱諸個得著聖神作頭水的果子的嘛啲吐氣聽候上帝接納咱作伊的子兒，互咱歸個人攏得著贖回。
24因為咱靠此款向望得著救。看會著的向望毋是向望。看會著的哪著向望？
25咱若向望彼個看𣍐著的就會忍耐聽候。
26親像按呢，咱軟弱的時聖神嘛有啲給咱扶持；因為咱毋知著按怎祈禱，毋拘聖神家己用話𣍐當表達的吐氣替咱祈求。
27了解人內心的上帝明白聖神的意思，因為聖神照上帝的旨意替信徒祈求。
28咱知，萬項事互相運作，互許個疼上帝的人，就是照伊家己的旨意選召的，攏有利益。
29因為上帝預先識的人，嘛預先決定互𪜶及伊的子的形像相同，通互伊的子佇多多兄弟中作大子。
30閣伊預先決定的人，伊嘛給𪜶揀召；伊揀召的人，伊嘛給𪜶宣判做義人；伊宣判做義人的，伊嘛互𪜶得著榮光。
上帝的疼31關係諸個代誌，咱欲按怎講？上帝若為咱，啥人會當抵敵咱？
32伊既然無惜家己的子，互伊為著咱眾人犧牲，豈𣍐將萬物嘛白白賜互咱？
33啥人會當控告上帝的選民？宣判𪜶做義人的是上帝！
34若按呢，啥人會當給𪜶定罪？無！基督耶穌已經死，閣上帝有互伊對死人中閣活，今坐佇上帝的正旁啲替咱祈求。
35啥人會當切斷基督對咱的疼？是患難，是困苦，是迫害，是枵餓，是散赤，是危險，抑是慘死？
36照聖經所記載：
因為你的緣故，阮歸日面對死的威脅；
人看阮親像欲互人刣的羊。
37攏毋是！佇諸個一切的代誌，咱靠疼咱的上帝得勝到有賰！
38因為我確信，無論是死，是活，是天使，是靈界的統領者抑是權力者，是現今抑是將來的，
39是天頂抑是地下的神靈，抑是其他的被造物，攏𣍐當切斷上帝通過咱的主基督耶穌對咱的疼！
Who We AreWhat We EelieveWhat We Do
2025 by iamachristian.org,Inc All rights reserved.
