以西結書 17 - 現代台語譯本漢字版(TTVH)-闽南语

鷹鳥及葡萄樹的譬喻

1上主對我講：

2「人子，你著給以色列人講一個譬喻，互𪜶想內面的意思。

3你著給𪜶講，至高的上主按呢講：『有一隻大鷹鳥，翼股大，毛長閣寔，色彩多閣媠。伊飛去黎巴嫩山頂，去到柏香樹的尾溜，

4啄斷柏香樹樹尾幼軟的枝，咬去做生理的地區，放佇做貿易的城市。

5伊閣對以色列提種籽栽佇肥的地，親像柳樹種佇水源充足的溪邊。

6種籽茁芽生長，成做細欉四界旋藤的葡萄樹。伊的枝伸向鷹鳥，釘根佇鷹鳥的下面，成做發枝旋藤的葡萄樹。

7「『另外有一隻大鷹鳥，翼股大，毛真寔。此欉葡萄樹將根及枝彎向此隻大鷹鳥，想欲得著比伊原來受栽種的土地閣較多灌沃的水。

8其實，此欉葡萄樹早就栽佇土肥水多的園裡，會當發枝，結果子，成做一欉𠢕結果子的葡萄樹。』

9「至高的上主閣講：『此欉葡萄樹豈會當閣長大茂盛？豈講第一隻大鷹鳥𣍐給伊連根拔起來，給伊的果子挽了了，互歸欉樹，連新發的枝葉嘛枯焦？按呢，毋免出大力抑是多人，就會當給伊連根拔起來。

10你看，葡萄樹雖然受栽種，毋拘豈會當長大茂盛？伊豈會堪得互東風搧？伊一定會佇伊生長的園裡枯焦。』」

解說譬喻

11上主對我講：

12「你給許個背逆的人問，看𪜶知諸個譬喻的意思無？你給𪜶講，巴比倫王曾來耶路撒冷，將猶大王及伊的人臣掠去巴比倫，

13閣對猶大王族中選一個人，及伊立約，叫伊咒誓。巴比倫王嘛將猶大國中一寡領導者掠去，

14互猶大國衰微無法度反抗，干焦會當靠守約來生存。

15毋拘猶大王反叛。伊派使者去埃及要求戰馬及大軍來支援。伊豈會成功？做此種代誌的人，豈會當逃脫？伊違背約定，豈有法度閃開刑罰？

16「至高的上主講：『我指我的性命立誓：此個王一定會死佇伊受設立作王的所在，因為巴比倫王設立伊作王，毋拘伊違背家己咒誓的話，廢除伊及巴比倫王立的約。

17當對敵巴比倫王來攻城，填土堆，起造攻打城牆的高台，進行大屠殺的時，埃及王強閣多的軍隊嘛𣍐當幫贊伊。

18伊違背家己咒誓的話，廢除伊及巴比倫王所立的約。伊已經投降，竟然做諸個事，今，伊無路通逃走啦。』

19「所以，至高的上主按呢講：『我指我的性命立誓：我欲刑罰伊，因為伊違背家己咒誓的話，廢除伊及我立的約。

20我欲設羅網，給伊掠起來，帶去巴比倫，給伊審判，因為伊對我不忠。

21所有逃走的戰士會戰死，賰落來的軍兵會逃走四散。按呢恁就知，講諸個話的是我上主。』」

上帝對將來的應允

22至高的上主按呢講：

「我欲遏斷柏香樹的樹尾，

將伊幼軟的枝遏落來，

給伊種佇高山頂。

23我欲給伊栽佇以色列的高山頂；

伊欲發枝，結果子，

成做一欉高閣媠的柏香樹。

逐種鳥仔飛來遮作巢，

歇佇伊樹枝的蔭影下。

24田野所有的樹木攏欲知：

我上主互大欉樹變細欉，互細欉樹大欉；

我互青翠的樹枯焦，互枯焦的樹茂盛。

我上主按呢講，一定按呢做。」