歷代志上卷 10 - 現代台語譯本漢字版(TTVH)-闽南语

掃羅王的死(撒上 31.1-13)

1 非利士人及以色列人佇基利波山交戰；以色列人死真多，戰敗逃走。

2非利士人追趇掃羅及伊許個子，刣死掃羅三個子約拿單、亞比拿達，及麥基‧舒亞。

3掃羅受著猛烈的攻擊；伊互射箭的人發見，射著，受傷真傷重。

4掃羅給替伊攑軍器的侍衛講：「拔刀給我鑿死，才免我互諸個無受割禮的人凌辱。」彼個侍衛毋敢，因為伊真驚。掃羅就向刀仆落去，家己鑿死。

5彼個侍衛看著掃羅已經死，嘛仆落去，家己鑿死。

6按呢，掃羅及伊三個子攏死，全家滅亡。

7佇耶斯列山谷彼旁的以色列人看著𪜶的軍隊已經逃走，掃羅及伊的子嘛攏戰死，就放城逃走。非利士人就來佔許個城，佇遐徛起。

8隔日，非利士人來剝戰死的人的物件，看著掃羅及伊的子死佇基利波山，

9就剝掃羅的軍服，提伊的頭殼及戰甲，派人去非利士逐所在，將此個消息報互𪜶的偶像及人民知。

10𪜶將掃羅的戰甲下佇𪜶神明的廟內，將伊的頭殼吊佇大袞的廟。

11基列的雅比人聽著非利士人對掃羅所做的代誌，

12𪜶的勇士攏起來，將掃羅及伊的子的身屍帶去雅比，將𪜶的骨骸葬佇雅比的橡樹腳，禁食七日。

13按呢掃羅死，因為伊背叛上主，無守上主的命令，去尋尪姨，求伊指點，

14無尋求上主，所以上主給伊刣死，將王位交互耶西的子大闢。