西番雅書 2 - 現代台語譯本漢字版(TTVH)-闽南语

呼籲悔改

1-2毋知見笑的國家，

著聚集！

佇命令猶未發出，

日子猶未親像粗糠飛去，

上主大受氣猶未到，

伊受氣的日猶未臨到恁以前，

著趕緊聚集！

3地上所有卑微、遵趁上主命令的人，

著尋求上主，

尋公義，求謙卑；

按呢佇上主受氣的日，恁才通逃避災難。

以色列周圍的國家受審判

4 迦薩會受棄拺，

亞實基倫會荒廢，

亞實突會佇透中晝受趕出，

以革倫會互人連根摳起來。

5住佇沿海的基利提人慘啊！

非利士人啲住的迦南地啊，

上主對恁宣判講：

「我欲徹底給你剿滅，無人留佇遮。」

6沿海的地會變做草場，

變做有牧者的草寮仔，有羊椆。

7此個地會歸互猶大所賰的子民，

𪜶會佇遐飼羊；

下昏時𪜶會佇亞實基倫的厝歇睏；

因為上主 — 𪜶的上帝會照顧𪜶，

互受掠的人倒轉來。

8我有聽著摩押的侮辱，

亞捫人的恥笑；

𪜶侮辱我的子民，

恐嚇欲侵佔𪜶的國土。

9因為按呢，上主 — 萬軍的統帥、以色列的上帝按呢宣告：

「我指我的性命立誓，

摩押會親像所多瑪，

亞捫人會親像蛾摩拉，

莿滿四界，遍地有鹽坑，

永遠荒廢。

我所賰的子民會給𪜶搶奪；

我國內留落來的人民會侵佔𪜶的土地。」

10𪜶受著此個報應，是因為𪜶驕傲；

𪜶侮辱，恐嚇上主 — 萬軍的統帥的子民。

11上主欲對𪜶顯出威嚴，

互世上的神明衰微；

列國及眾海島的住民

攏會佇家己住的所在敬拜上主。

12 古實人啊，恁嘛會互我的刀刣死。

13上主欲伸手攻擊北方，剿滅亞述；

互尼尼微荒廢，親像焦燥的曠野。

14逐種的野獸會歸群歇佇遐；

鵜鶘及豪豬歇佇柱座頂面；

窗仔內有哮的聲，戶橂毀壞，

柏香柴板露出。

15此個宴樂安然徛起的城，

曾心內講：「我是全世界上偉大的城！」

今竟然即呢荒廢，

成做野獸歇睏的所在！

對遐經過的人，攏會幌頭恥笑。