詩篇 36 - 現代台語譯本漢字版(TTVH)-闽南语

上主的僕人大闢的詩，交互聖樂長。人的罪惡及上帝的公義

1罪佇歹人的心底策動；

伊眼中毋驚上帝。

2對伊來看，罪是伊的誇口，

家己想講上帝𣍐發見，𣍐厭惡。

3伊講的話攏是罪惡及奸詐；

伊無閣再有智慧，嘛無好的行為。

4伊佇眠床頂猶啲計謀罪惡。

伊決定欲行歹路，

毋棄拺歹代。

5上主啊，你的慈愛高到抵天；

你的信實到穹蒼。

6你的公義親像極高的山；

你的判斷親像深淵。

上主啊，人及牲生你攏眷顧。

7上帝啊，你的慈愛哪赫寶貝！

世間人攏來匿佇你翼股的保護下。

8𪜶欲佇你的厝享受豐富的宴席；

你欲互𪜶飲你快樂的河水。

9因為活命的源頭在佇你；

對你的光，阮看見光。

10願你繼續施落慈愛互識你的人，

施落公義互心內正直的人。

11毋通容允驕傲的人的腳踐踏我；

毋通容允兇惡的人的手趕逐我。

12你看，做歹的人已經倒落去；

𪜶受捙倒，𣍐當閣起來。