詩篇 16 - 現代台語譯本漢字版(TTVH)-闽南语

大闢的金詩。信靠的祈禱

1上帝啊，求你保護我，

因為你是我的避難所。

2我曾對上主講：「你是我的主；

只有你是我幸福的源頭。」

3地上的聖徒實在真尊貴；

及𪜶做夥是我上大的歡喜。

4去隨別個神明的人一定加添痛苦！

我毋參與𪜶的獻祭，

嘛毋敬拜𪜶的神明。

5上主，你是我的產業，我的福杯；

你顧守我應得的份額。

6你將真媠的土地分互我；

我得著的產業實在真好！

7我欲稱讚教示我的上主；

暝時，我的心指點我。

8我不時感受上主的同在；

伊佇我的正旁，我𣍐動搖。

9所以，我的心歡喜，我的神快樂；

我的肉體安然自在。

10因為你𣍐給我放拺佇陰府，

嘛𣍐互你忠誠的子民落去深淵。

11你會指示我活命的道路。

佇你面前，我有滿滿的歡喜；

佇你正旁，我有永遠的快樂。