創世記 37 - 現代台語譯本漢字版(TTVH)-闽南语

約瑟及伊的兄弟

1 雅各徛起佇伊的老父寄居的迦南地。

2下面是雅各的家庭的記事。

約瑟十七歲的時及伊的兄哥做夥去顧羊；伊是一個少年人，常常給伊老父的細姨辟拉及悉帕的子鬥腳手。約瑟會將兄哥的歹品行給𪜶老父報告。

3佇所有的子中間，雅各上疼約瑟，因為約瑟是伊年老的時生的；伊給約瑟做一領長手袂的外袍。

4約瑟的兄哥看著𪜶老父較疼約瑟，就怨妒伊，無欲及伊好好仔講話。

5 約瑟夢見一個夢，給伊許個兄哥講；𪜶就閣較怨妒伊。

6約瑟給𪜶講：「請恁聽我講我夢著什麼。

7咱佇園裡縖麥捆；忽然，我縖的麥捆起來徛啲，恁縖的圍啲拜我的麥捆。」

8伊的兄哥應伊講：「你豈真正欲做阮的王？真正欲管阮？」𪜶就因為伊的夢及伊的話閣較怨妒伊。

9後來，約瑟閣夢著一個夢，閣給伊的兄哥講：「恁看，我閣夢著一個夢；日頭、月娘，及十一粒星攏啲給我拜。」

10 約瑟將此個夢給伊的老父及兄哥講；伊的老父就給伊責備，講：「你烏白夢。豈講我及恁老母、恁兄弟仔，攏欲仆拜你？」

11伊的兄哥攏怨妒伊；伊的老父將此個事記佇心內。

約瑟受賣去埃及

12 約瑟的兄哥去示劍飼𪜶老父的羊。

13雅各給約瑟講：「恁兄哥佇示劍飼羊。你來，我想欲叫你去𪜶遐。」

伊應講：「好，我來去。」

14 雅各給伊講：「你去看恁兄哥有平安，羊群有好勢抑無；倒來給我講。」雅各就佇希伯崙山谷送伊出發；伊就去到示劍。

15有人看著約瑟佇野地迷路，就問伊講：「你啲尋什麼？」

16伊講：「我啲尋我的兄哥。請給我講，𪜶佇叨位啲飼羊。」

17彼個人給伊講：「𪜶已經離開遮，因為我有聽著𪜶啲講：『咱來去多坍。』」約瑟就趇去尋𪜶兄哥；佇多坍尋著𪜶。

18𪜶佇遠遠看著約瑟；伊猶未到𪜶遐，𪜶就計謀欲害死伊。

19𪜶互相講：「看咧，彼個作夢的來啦。

20互來！來給刣死，給伊㧒𫢶坑裡，講伊互野獸食去；咱才看伊的夢將來按怎。」

21 呂便聽著，想欲救約瑟，就講：「咱毋通害伊的性命。」

22呂便閣給𪜶講：「毋通互伊流血。咱通給伊㧒佇此個曠野的坑裡，毋通傷害伊。」伊按呢講，意思是欲救約瑟脫離𪜶的手，互伊倒去𪜶老父遐。

23約瑟到伊的兄哥遐，𪜶隨時剝伊穿啲彼領長手袂的外袍，

24給伊掠啲，㧒落坑；彼個坑空空，內面無水。

25𪜶坐啲食餅的時，攑頭看，看著一陣對基列來的以實瑪利人的商隊；𪜶的駱駝載香料、乳香、沒藥欲落去埃及。

26猶大對諸個兄弟講：「咱刣死咱小弟，掩蓋咱的罪，有什麼利益？

27咱來給伊賣互以實瑪利人；毋通下手害伊，因為伊是咱的小弟，咱的骨肉。」兄弟攏同意。

28許個米甸的生理人對遐過的時，約瑟的兄哥給伊對坑裡扭起來，用二十個銀將伊賣互以實瑪利人。許個人就帶約瑟去埃及。

29 呂便倒轉來坑遐，看著約瑟無佇內面，就拆裂家己的衫，

30倒去伊的小弟遐，講：「少年的無去啊；我咧，我欲按怎？」

31𪜶就刣一隻山羊，將約瑟彼領外袍滒血，

32派人提彼領衫去𪜶老父遐，講：「阮尋著此領，請認看是毋是恁子的外袍。」

33 雅各認著彼領衫，就講：「這是我的子的外袍。約瑟一定互野獸食去，互野獸拆碎啦！」

34雅各就拆裂外衫，腰縖麻布，為著伊的子約瑟哀傷多多日。

35伊的子及查某子攏給伊安慰；伊毋肯受安慰，講：「我寧可哀傷落去陰府，去我的子遐。」雅各為著約瑟啼哭。

36 米甸人帶約瑟去到埃及，將伊賣互法老的人臣侍衛長波提乏。