1咱諸個信心堅強的人應該給信心軟弱的人鬥擔重擔。毋通求互家己歡喜；
2咱逐個人著求互厝邊歡喜，互𪜶得著利益通建立信心。
3因為基督無求互家己歡喜，反轉親像聖經所記載：「侮辱你的人的侮辱攏歸佇我。」
4早前所寫的攏是為著欲教示咱來寫的，互咱對忍耐及聖經的安慰得著向望。
5願賜忍耐及安慰的上帝互恁同心志學習基督耶穌的模樣，
6通同心同聲榮耀咱的主耶穌基督的父上帝！
對外邦人傳福音7所以，為著榮耀上帝，恁著互相接納，親像基督有接納恁。
8我給恁講，基督成做受割禮的人的差用，是欲顯示上帝的信實，通證明上帝對咱祖先的應允有實現，
9嘛欲互外邦人因為上帝的憐憫通歸榮光互伊。照聖經所記載：
所以，我欲佇外邦人中間宣認你，
唱歌謳咾你的名。
10伊閣講：
外邦人啊，
著及上帝的子民做夥歡喜。
11伊閣講：
萬國啊，著謳咾主；
萬民啊，著頌讚伊。
12 以賽亞閣再講：
耶西的根會茁芛，
伊會起來統治外邦；
外邦人攏會將向望交託伊。
13願賜向望的上帝，因為恁對伊的信心，互恁充滿逐款的歡喜及平安，閣互恁對聖神的能力充滿向望！
保羅的宣教使命14我的兄弟姊妹，我家己確信恁非常良善，充滿逐款的智識，閣會曉互相苦勸。
15毋拘我好膽寫此張批互恁，給恁提醒幾點；因為上帝有賜我特別的恩典，
16通佇外邦人的中間服事基督耶穌，作祭司宣講上帝的福音，通互外邦人成做聖神所聖化，上帝接納的祭物。
17所以，因為基督耶穌的緣故，我看服事上帝做榮光。
18-19我毋敢講別項代誌，只有欲講此項，就是基督通過我的言語及行為，用神跡奇事的能力，及上帝的神的能力，互外邦人順服上帝。所以對耶路撒冷周圍一直到以利哩古地區，我逐所在去宣揚基督的福音。
20我決意無欲佇已經聽著基督的名的所在傳福音，才𣍐佇別人的地基頂起厝。
21照聖經所記載：
毋曾聽著伊的代誌的人會看見；
毋曾聽見伊的人會明白。
保羅計劃訪問羅馬22我有真多遍抵著阻擋，𣍐當去恁遐。
23毋拘今佇諸個地區無別個所在通去，閣幾若年來，我一直啲向望會當去恁遐。
24此遍欲去西班牙的路中，我向望會經過恁遐去看恁，先及恁有一段時間歡喜的交陪，然後才互恁給我送行繼續去西班牙。
25毋拘我現在著先去耶路撒冷供給許個信徒的需要，
26因為馬其頓及亞該亞的教會歡喜獻一筆錢幫贊耶路撒冷一寡散赤的信徒。
27這是𪜶歡喜做的，其實嘛是𪜶所欠的債。既然猶太信徒有及外邦人分享屬靈的福氣，外邦的信徒應該佇物質上幫贊𪜶。
28聽候我此項代誌做好勢，將捐募的此筆錢交互𪜶了後，才經過恁遐去西班牙。
29我知我去恁遐的時，嘛會將基督豐富的恩典帶去互恁。
30兄弟姊妹，通過咱的主耶穌基督及聖神所賜的疼心，我請恁盡力及我做夥為著我祈求上帝，
31互我免受著猶太毋信的人的陷害，閣互我佇耶路撒冷辦理供給的代誌會得著信徒接納。
32按呢，我就通歡歡喜喜照上帝的旨意去恁遐，及恁做夥重新得著氣力。
33願賜平安的上帝及恁大家同在。阿們！
Who We AreWhat We EelieveWhat We Do
2025 by iamachristian.org,Inc All rights reserved.
