詩篇 35 - 現代台語譯本漢字版(TTVH)-闽南语

大闢的詩。求幫贊的祈禱

1上主啊，及我爭論的人，求你及𪜶爭論；

及我交戰的人，求你及𪜶交戰。

2求你提大細的盾牌起來幫贊我，

3用槍對付追趕我的人。

求你對我講：「我是你的拯救者。」

4求你互數想我性命的人受凌辱見笑；

求你互計謀陷害我的人撤退漏氣。

5求你互𪜶親像互風吹的粗糠，

有上主的使者給𪜶趕散。

6求你互𪜶的路暗閣滑，

有上主的使者給𪜶追趕。

7𪜶無緣無故暗設羅網欲當我，

掘陷坑欲害我的性命。

8求你互災禍佇無拍算的時臨到𪜶身上；

你互𪜶暗設的羅網纏著家己，

跋落彼內面受害。

9按呢，我的心會因為上主快樂，

因為伊的救恩歡喜。

10我歸個人攏欲講：

「上主啊，無人會當及你比！

你拯救困苦的脫離比伊較強的人，

拯救困苦散赤的脫離搶奪伊的人。」

11兇惡的見證人徛出來；

𪜶查問我毋知的事。

12𪜶對我用歹報好，

互我孤苦無助。

13毋拘，𪜶破病的時，我穿麻衫悲傷，

刻苦禁食，為著𪜶俯頭祈禱。

14我款待𪜶做我的朋友，做我的兄弟；

我屈落哀傷，假若為著老母死去啲悲傷。

15毋拘我跋倒失敗的時，𪜶鬥陣歡喜；

連生份人嘛一直給我凌辱攻擊。

16𪜶做夥睥相我，恥笑我，

痛恨我，對我咬牙切齒。

17主啊，你哪恬恬啲看，欲看偌久？

求你救我脫離𪜶的殘害，

救我的性命脫離少壯的獅。

18我欲佇大聚會中感謝你，

佇眾人的中間稱讚你。

19求你毋通容允無緣無故敵對我的人對我誇口，

毋通互無理由怨恨我的人給我睨。

20因為𪜶無講和平的話，

顛倒造謠中傷意愛和平的人。

21𪜶開嘴大聲攻擊我，講：

「你看咧！阮有親目看著。」

22上主啊，你已經有看著，求你毋通恬恬；

主啊，毋通徛遠遠毋插我。

23我的上帝，我的主啊，

求你精神，求你起來，

為我辯護，替我申冤。

24上主 — 我的上帝啊，求你照你的公義判斷，

毋通互𪜶佇我的面前洋洋得意。

25毋通容允𪜶心內講：「你看，代誌抵照阮的心願！」

毋通容允𪜶講：「阮已經給伊吞落去。」

26願愛我抵著患難的人見笑漏氣；

願驕傲對待我的人攏失望見笑。

27願愛我受判無罪的人快樂唱歌；

願𪜶不時講：「著尊上主做大，

因為伊意愛伊的僕人平安繁榮。」

28我的嘴舌欲宣揚你的義，

歸日攏稱讚你。