1這是有關沿海曠野的信息。
捲螺仔風對南部的沙漠掃過來，
對曠野，對恐怖的地來。
2我有看見悽慘的異象：
背叛的人繼續背叛；
破壞的人一直破壞。
以攔，上去攻擊！
米底亞，給伊包圍！
上主欲結束巴比倫所造成的痛苦。
3所以，我的腰劇烈痛疼，
親像產婦啲催陣。
我驚甲什麼都聽𣍐著；
我惙甲什麼都看無。
4我的心混亂，
恐怖互我皮皮惙；
我所意愛的黃昏互我㘈㘈顫。
5𪜶排設宴席，
地毯鋪好勢，
亦食亦飲。
「領袖，起來！
用油擦盾牌！」
6主給我講：
「你去，去安排一個守望的，
叫伊給你報告伊看著的事。
7伊會看著軍隊，
馬兵一對一對，
閣有騎驢仔的，
騎駱駝的。
伊著聽，
著注意聽！」
8然後守望的喝講：
「主啊，我逐日徛啲守望，
逐暝佇守望台看守。
9看咧，馬兵來啦！
一對一對啲來！」
後來伊閣喝講：
「巴比倫倒落去啦，倒落去啦！
一切的神明偶像
攏摃碎落甲歸土腳。」
10噢，恁受拍碎，倒甲歸拍麥場，我的同胞啊，
我對上主 — 萬軍的統帥、以色列的上帝聽著的，我攏給恁講啦！
有關以東的信息11這是有關以東的信息。
有人對以東啲喝，講：
「守望的，現在幾更？
守望的，暝時閣偌久才會過去？」
12守望的應講：
「早起時啲欲來啊，毋拘猶是暝時。
你若愛問，做你問，
嘛通閣轉來問。」
有關阿拉伯的信息13這是有關阿拉伯的信息。
佇阿拉伯的樹林歇暝的底但商隊啊，
14著提水來互嘴焦的人飲。
提瑪的住民啊，
著帶食物互逃難的人食。
15因為𪜶逃避刀劍，
啲逃閃已經拔出的刀劍；
𪜶閃避已經扭開的弓，
啲逃閃猛烈的戰爭。
16主對我講：「佇一年內，照倩工簽約的年限，基達所有的榮華攏會無去；
17攑弓箭的基達勇士會賰真少。」上主 — 以色列的上帝按呢宣告。
Who We AreWhat We EelieveWhat We Do
2025 by iamachristian.org,Inc All rights reserved.
