申命記 12 - 現代台語譯本漢字版(TTVH)-闽南语

唯一的敬拜場所

1恁住佇上主 — 恁的列祖的上帝賞賜恁做產業的地的時，著遵守下面諸個規例及命令。

2恁欲佔領的國家，𪜶的人民啲服事神明的所在，無論佇高山，佇小山，佇青翠的樹下面，攏著給毀壞；

3恁嘛著拆毀𪜶的祭壇，摃碎𪜶的石柱像，用火燒𪜶的亞舍拉女神的神像，剉斷𪜶雕刻的偶像，互人𣍐閣去許個所在敬拜。

4恁毋通學𪜶的方式服事上主 — 恁的上帝。

5只有通佇上主 — 恁的上帝將來對恁的支族揀選的所在敬拜伊，尋求伊；

6將恁的燒化祭、別款的祭物、十分一的奉獻、其他的禮物、謝願的祭、甘心獻的祭，以及頭上生的牛及羊，攏帶去遐。

7佇遐，恁及恁的家眷著佇上主 — 恁的上帝面前飲食，為著伊佇恁所做的一切給恁賜福來歡喜。

8-9咱今仔日猶未去到上主 — 咱的上帝賞賜咱安歇及做產業的地，逐個人照家己看做著的去做，將來入去了後就毋通按呢。

10恁過約旦河，去住佇上主 — 恁的上帝互恁承接的地，閣互恁無受四圍對敵的攪擾，得著太平，安居樂業；

11彼時，上主 — 恁的上帝會揀選一個互恁通敬拜伊的所在，恁著照我的命令，將燒化祭、別款的祭物、十分一的奉獻、其他的禮物，以及恁對上主下願欲獻的好物，攏帶去遐獻互伊。

12恁及恁的子、查某子、奴僕、女婢，攏著及住佇恁中間的利未人，佇上主 — 恁的上帝面前做夥歡喜；著會記得，利未人佇恁中間無分著產業。

13恁著謹慎，毋通佇恁看合意的所在獻燒化祭；

14只有通佇上主所揀選某一個支族的所在獻燒化祭，閣佇遐照我所命令恁的一切去做。

15恁佇恁住的所在，通照上主 — 恁的上帝賞賜恁的福分，照恁的意思刣牲生食肉；無論禮儀上清氣抑是無清氣的人攏通食，親像啲食羚羊及鹿。

16毋拘血毋通食，著摒佇土腳，親像啲摒水。

17恁的五穀、新酒、新油、十分一的奉獻、頭上生的牛羊、下願欲獻的物、甘心獻的祭，抑是其他的禮物，攏毋通佇恁住的所在食；

18只有通佇上主 — 恁的上帝揀選的所在，及你的子、查某子、奴僕、女婢，以及住佇恁中間的利未人，佇上主的面前做夥飲食，做夥歡喜，享受恁的手所做的成果。

19著謹慎，恁住佇恁的土地，著永遠照顧利未人。

20上主 — 恁的上帝照伊的應允互恁的土地擴展的時，恁若想講欲食肉，就通照恁的意思食。

21上主 — 恁的上帝揀選欲做恁敬拜伊的所在若離恁真遠，恁通照我的命令，將上主賞賜的牛、羊，照恁所愛，佇恁住的所在刣來食。

22恁禮儀上清氣及無清氣的人通做夥食，親像啲食羚羊及鹿。

23毋拘絕對毋通食血，因為血是性命；恁毋通肉及性命做夥食。

24血毋通食，著摒佇土腳，親像啲摒水。

25毋通食血，恁及恁的後代就會得著福氣，因為恁按呢做是上主看做著的事。

26恁的祭物及謝願的祭，攏著帶去上主欲揀選的所在。

27恁的燒化祭的肉及血，著獻佇上主 — 恁的上帝的祭壇頂；其他的祭物，血著摒佇上主 — 恁的上帝的壇頂；肉，恁通食。

28我所命令恁諸個話，恁攏著遵守聽趁，做上主 — 恁的上帝看做好、看做著的事；按呢恁及恁的後代就會永遠得著福氣。

毋通拜別個神明

29上主 — 恁的上帝佇恁的面前將許個國的人民趕走，消滅，互恁佔領𪜶的地，佇遐徛起；

30彼時，恁著謹慎，毋通佇𪜶消滅了後學𪜶，煞陷落𪜶的羅網；毋通探聽𪜶拜神明的事，講：「諸個人民按怎啲服事𪜶的神明，阮嘛欲按呢做。」

31恁毋通用𪜶的方式服事上主 — 恁的上帝，因為𪜶服事𪜶的神明的時，做上主痛恨厭惡的事，甚至燒𪜶的子查某子獻互𪜶的神明。

32我命令恁的，恁攏著切實遵行；毋通加添，嘛毋通減少。