羅馬書 4 - 現代台語譯本漢字版(TTVH)-闽南语

亞伯拉罕的模範

1按呢，關係咱血統的祖先亞伯拉罕，咱欲講什麼？

2亞伯拉罕若是對行為受稱做義人，伊就有通誇口，毋拘對上帝看，伊無通誇口。

3因為聖經有記載：「亞伯拉罕信上帝，因為按呢，上帝就給伊算做義。」

4人做工得著工錢無算恩典，是應該。

5毋拘無靠行為，只有信彼位宣判罪人做無罪的上帝的人，伊因為有此個信，上帝就給伊算做義。

6大闢嘛有講起無靠行為互上帝給伊算做義的人有福氣。伊講：

7過失得著赦免，罪過得著擦消，

此款人真有福氣！

8主無算伊有罪的，

此款人真有福氣！

9按呢，此個福氣只有互受割禮的人是無？毋是，嘛互無受割禮的人。因為咱已經有講：「亞伯拉罕因為信，上帝就給伊算做義。」

10是按怎算？是伊受割禮以前，抑是以後？是割禮以前，毋是割禮以後。

11後來伊有受割禮；此個割禮是一種記號，印證伊猶未受割禮以前就對信互上帝接納做義人。許個無受割禮的人因為信，上帝有接納𪜶做義人，通互亞伯拉罕作許個無受割禮的信徒的祖先。

12伊嘛是受割禮的人的祖先；𪜶毋若受割禮，嘛有照咱的祖先亞伯拉罕受割禮以前信心的模範啲生活。

應允的實現

13上帝應允亞伯拉罕及伊的子孫欲互𪜶承受世界做產業；此個應允毋是通過律法，是通過信來得著的義。

14若遵守律法的人才會當承受上帝的應允，信就空空，應允嘛無路用。

15律法會惹起上帝的受氣；無律法就無違法。

16因為按呢，應允是用信做根據，欲保證應允是對上帝白白的恩典，互亞伯拉罕所有的子孫，毋若有受割禮的人，嘛包含許個及亞伯拉罕像款有信上帝的人。伊是咱眾人的祖先；

17照聖經所記載：「我有互你作萬民的祖先。」此個應允佇上帝面前有效。亞伯拉罕信此位互死人閣活，閣互無變做有的上帝。

18伊佇無通向望的時猶囥向望，信講伊會成做萬民的祖先，照所應允的話講：「你一定有真多子孫。」

19伊已經成百歲，想著家己的身軀若親像死去，莎拉亦已經𣍐生子，毋拘亞伯拉罕無因為按呢失去信心。

20伊對上帝的應允無懷疑，信心反轉愈堅定，將榮光歸互上帝。

21伊確信上帝一定會實現家己的應允。

22所以，亞伯拉罕因為信，上帝給伊算做義。

23毋拘，「給伊算做義」此句話毋是干焦為著伊，

24嘛是為著咱諸個人寫的，因為咱有信上帝互咱的主耶穌對死人中閣活，咱嘛會受算做義。

25為著咱的罪過，上帝將主耶穌交互人害死，閣為著欲互咱及上帝有合宜的關係，上帝有互伊閣活。