詩篇 143 - 現代台語譯本漢字版(TTVH)-闽南语

大闢的詩。求幫贊的祈禱

1上主啊，求你聽我的祈禱，

俯耳孔聽我的懇求，

照你的信實，照你的公義應答我。

2求你毋通審問你的僕人，

因為佇你面前，活啲的人無一個是義人。

3對敵窘迫我，

將我徹底拍倒佇土腳，

互我𫢶佇烏暗的所在，親像死真久的人，

4致到我的心神失志，強欲暈去；

我的心驚甲愣去。

5我會記得古早的日，

數念你一切的作為，

靜靜想你手的所做。

6我向你攑手；

我的心渴慕你親像曠旱的地聽候雨水。

7上主啊，求你趕緊應答我；

我的心神聽候你到欲暈去。

毋通面越走毋插我，

才免我親像死去的人。

8求你互我早起時聽見你慈愛的聲，

因為我倚靠你。

求你互我知應該行的路，

因為我的心仰望你。

9上主啊，求你解救我脫離我的對敵，

互我通走去匿佇你遐。

10你是我的上帝，求你教示我遵行你的旨意。

願你良善的神引導我行平坦的路。

11上主啊，求你因為你的名互我閣活起來，

照你的公義引導我脫出患難。

12求你照你的慈愛消滅我的對敵，

剿滅所有苦楚我的人，

因為我是你的僕人。