1 烏西亞王過身彼年，我看見主坐佇真高的寶座頂；伊的長袍垂落來，蓋滿聖殿。
2伊的周圍有撒拉弗天使徛啲侍候；每一個有六支翼，兩支遮面，兩支遮腳，兩支做翼飛。
3𪜶彼此呼應：
聖哉，聖哉，聖哉！
上主 — 萬軍的統帥！
伊的榮光充滿全地！
4門框的根基因為呼應的聲搖泏，聖殿有煙滿滿。
5彼時我講：
我有災禍，我滅亡啦！
因為我是嘴唇無清氣的人，
閣住佇嘴唇無清氣的人中間。
我的目睭有看著王，
上主 — 萬軍的統帥。
6然後，有一個撒拉弗飛倚來我遮，伊的手用火夾對祭壇頂夾一塊熱熱的炭，
7將炭焐我的嘴唇，講：
今，此個焐著你的嘴唇，
你的罪過已經除去，
你的罪惡有得著赦免。
8了後，我聽見主的聲，講：「我通差啥人？啥人欲為著阮去？」我就講：「我佇遮，請差我！」
9伊閣講：「你去給此個子民講：
恁聽閣聽，毋拘𣍐明白；
恁看閣看，毋拘𣍐了解。
10你著互此個子民的心鈍，
耳孔重，
目睭花；
才免𪜶目睭看見，
耳仔聽見，
心明白，
越倒轉來得著醫治。」
11我就講：「主啊，著偌久？」
伊應：「著到城市荒廢，無人住，
厝無人徛，
土地徹底拋荒。
12一直到上主將眾人徙去到遙遠的所在，
境內真多土地受棄拺；
13連彼所在所賰的十分一的人，
嘛會閣受毀滅。
但是，親像栗樹、橡樹，
雖然互人剉起來，毋拘樹頭猶留啲；
彼個樹頭是聖的族類。」
Who We AreWhat We EelieveWhat We Do
2025 by iamachristian.org,Inc All rights reserved.
