詩篇 92 - 現代台語譯本漢字版(TTVH)-闽南语

安歇日的詩歌。頌讚上主的公正及慈愛

1上主啊，阮感謝你；

至高者啊，唱歌稱讚你的名實在真好！

2阮早起時報揚你的慈愛，

下昏時報揚你的信實，

3彈十條弦的豎琴，

用樂器美妙的聲音伴奏。

4上主啊，你用你的作為互我歡喜；

我欲因為你的手的所做唱歌快樂。

5上主啊，你的作為赫呢偉大，

你的意念赫呢深奧；

6無智識的人𣍐了解，

愚戇的人嘛𣍐明白。

7歹人親像草茂盛；

做歹的人雖然興旺，

一定攏會滅亡。

8總是上主你至尊，永遠掌權。

9上主啊，你的對敵一定滅亡；

所有做歹的人攏會受拍散。

10總是你有加添我的氣力，互我親像野牛赫呢勇壯，

因為你有用新的油倒佇我身上。

11我親目看著我的對敵受報應，

親耳聽著攻擊我的歹人受刑罰。

12義人會興旺親像棕樹，

會生長親像黎巴嫩的柏香樹；

13諸個樹栽佇上主的殿，

佇咱上帝的埕茂盛。

14樹老的時猶會結果子，

汁真多，色青翠，

15啲顯示上主公正，攏無不義；

伊是保護我的石磐。