申命記 34 - 現代台語譯本漢字版(TTVH)-闽南语

1 摩西對摩押平原上尼波山，到耶利哥對面的比斯迦山頂。上主將全地互伊看：對基列到但、

2拿弗他利地區、以法蓮及瑪拿西地區、猶大地區到地中海、

3南旁的尼革夫，及棕樹城耶利哥的平原，到瑣珥。

4上主給伊講：「此個地是我對亞伯拉罕、以撒、雅各立誓，應允欲賞賜𪜶的後代的地。今，我互你親目看著此個地，毋拘你𣍐當入去遐。」

5照上主所講，上主的僕人摩西死佇摩押地區。

6上主將伊埋葬佇摩押地區，伯‧比珥對面的山谷；到今仔日無人知伊埋葬的所在。

7摩西死的時一百二十歲，目睭無花，精力無衰退。

8以色列人佇摩押平原為著摩西悲傷哀哭滿三十日。

9 嫩的子約書亞得著智慧的神充滿，因為摩西曾給伊按手。以色列人順趁約書亞，照上主命令摩西的話做。

10後來，上主無閣佇以色列人的中間興起親像摩西的先知；摩西是上主面對面認識的。

11上主差伊佇埃及地，對法老及攏總的人臣，以及埃及全地行真多神跡奇事；

12閣佇以色列眾人的目睭前，互伊有大氣力做大閣通驚的事。