詩篇 62 - 現代台語譯本漢字版(TTVH)-闽南语

大闢的詩，照耶杜頓的作法，交互聖樂長。信靠上帝

1我的心神靜靜，專心聽候上帝；

我的拯救是對伊來。

2只有伊是保護我的石磐，我的拯救；

伊是我的堡壘，我攏𣍐動搖。

3恁攻擊一個人欲到什麼時？

恁親像啲拺敧斜的牆，欲倒的壁按呢給彼個人毀壞。

4恁鬥陣計謀，一直欲給伊對尊貴的位捙落去；

恁愛講白賊。

恁嘴祝福，心咒詛。

5我的心神啊，著靜靜，專心聽候上帝，

因為我的向望對伊來。

6只有伊是我的石磐，我的拯救；

伊是我的堡壘，我攏𣍐動搖。

7我的拯救，我的光榮在佇上帝；

伊是我的大石磐，我的避難所。

8萬民啊，著不時倚靠伊，

對伊吐露恁的心情。

上帝是咱的避難所。

9人真正是空虛，

會死的人攏是虛假，

下佇天秤一定浮起來；

𪜶合起來猶比呼吸的氣較輕。

10毋通靠暴力，

毋通靠搶奪；

財寶加添嘛毋通想欲靠伊。

11上帝講一項，

我聽著兩項：

權能屬佇上帝，

12慈愛嘛屬佇伊。

主啊，你欲照逐人的所做給伊報應。