詩篇 60 - 現代台語譯本漢字版(TTVH)-闽南语

大闢及美索不達米亞，以及瑣巴的亞蘭人交戰的時，約押倒來鹽的山谷，刣死以東人一萬兩千。彼時大闢做此首金詩，互人學習；交互聖樂長；調，用「見證的百合花」。為著勝利祈禱

1上帝啊，你有棄拺阮，拍碎阮；

你有對阮受氣，今求你閣轉來阮遮。

2你給地搖振動，互伊裂開；

求你修補伊的裂痕，因為地猶啲振動。

3你有互你的子民抵著苦難，

有互阮飲互人顛來顛去的酒。

4你為著敬畏你的人搧大旗，

召集𪜶，互𪜶脫離弓箭的攻擊。

5求你回應阮，用你大權能的手拯救阮，

互你所疼的人得著解救。

6上帝佇伊的聖所講：

「我大勝利啦！

我欲分割示劍，分配疏割的山谷。

7 基列是我的，瑪拿西嘛屬我；

以法蓮是我的頭盔；

猶大是我權柄的柺。

8 摩押做我的浴盆；

我㧒我的鞋佇以東

，

向非利士喝勝利的聲。」

9啥人欲導我入去堅固的城？

啥人欲導我入去以東的地？

10上帝啊，你豈有棄拺阮？

上帝啊，你豈𣍐閣及阮的軍隊鬥陣出征？

11求你援助阮攻擊對敵，

因為人的幫贊𣍐靠得。

12靠上帝阮才會得勝；

伊會拍敗阮的對敵。