詩篇 26 - 現代台語譯本漢字版(TTVH)-闽南语

大闢的詩。正直的人的祈禱

1上主啊，求你判我無罪，

因為我有照正直啲行。

我倚靠上主無動搖。

2上主啊，求你監察我，考驗我；

求你察驗我的心思意念。

3因為你的慈愛佇我的目睭前；

我有照你的真理啲行。

4我毋曾及虛假的人做夥坐，

嘛毋曾及假好的人鬥陣。

5我厭惡及歹人結黨，

無愛及惡毒的人做夥坐。

6上主啊，我洗手表示無罪，

踅你的祭壇參加禮拜；

7我用感謝的詩歌頌讚，

講起你一切奇妙的作為。

8上主啊，我意愛你住的厝，

意愛你的榮光臨在的所在。

9毋通將我的性命及罪人做夥消滅；

毋通將我的活命及刣人的做一下消滅。

10𪜶的手不時做歹；

𪜶的正手逐所在收賄賂。

11若是我，我欲照正直來行；

求你救贖我，憐憫我。

12我的腳徛佇平坦的所在；

我欲佇大會中稱讚上主。