1恁摩押的難民著對曠野的西拉，
送羊仔做禮物互耶路撒冷的領袖。
2 摩押的人民會佇亞嫩河無目的賴賴趖，
親像鳥仔互人對鳥仔巢趕出去，
逐所在流浪，飛來飛去。
3𪜶會對猶大人講：
恁著給阮指教，教阮著按怎做。
求恁互恁的蔭影佇日時親像暗暝，
給阮諸個逃命的蓋起來，
互難民的行蹤無人知。
4求恁容允受趕逐的摩押人及恁住，
通做𪜶的避難所，互𪜶免受毀滅。
當壓迫停止，
破壞煞，
強暴對國內消失的時，
5 大闢家有一位王會用信實統治，
伊的王位會用仁愛堅立；
伊是尋求公平，
實踐公義的審判者。
6 猶大的人民講：
聽講摩押人非常驕傲，
自高自大，驕傲到極；
𪜶的誇口攏是空空。
7所以，摩押著啼哭，
每一個摩押人著為摩押啼哭。
恁會因為食𣍐著吉珥‧哈列設的葡萄乾丸哀傷。
8 希實本的田園荒廢，
西比瑪的葡萄樹焦去。
列國的君王遏折葡萄樹上好的枝；
許個枝曾伸到雅謝，旋去曠野，
甚至𨃟過海，去到外國。
9所以，我欲及雅謝做夥為著西比瑪的葡萄樹啼哭。
希實本及以利亞利啊，
我欲用目屎給恁灌沃，
因為恁收成成熟的果子
及五穀歡呼的聲已經煞。
10歡喜快樂
已經對果子園消失啦。
佇葡萄園無閣聽著歌聲，
嘛無閣有歡呼。
無閣有人佇酒窟踏酒；
我互歡呼的聲停止。
11所以，我的心為著摩押悲傷，
我的心腸為著吉珥‧哈列設哀傷，
親像琴發出哀怨的聲。
12 摩押人雖然拼命去山頭壇，閣去𪜶的聖所祈禱，總是攏無採工。
13以上是以前上主所講有關摩押的話。
14現在上主講：「佇三年內，照倩工的年限，摩押的榮華一定會消失，雖然人口赫呢多，毋拘賰落來的人會真少，閣衰弱。」
Who We AreWhat We EelieveWhat We Do
2025 by iamachristian.org,Inc All rights reserved.
