申命記 7 - 現代台語譯本漢字版(TTVH)-闽南语

上主的子民(出 34.11-16)

1上主 — 恁的上帝會導恁入去恁欲佔領的地，對恁的面前將七個比恁較強大的民族趕走，就是赫人、革迦撒人、亞摩利人、迦南人、比利洗人、希未人、耶布斯人。

2上主 — 恁的上帝將𪜶交佇恁的手，互恁給𪜶拍敗。彼時，恁著給𪜶徹底消滅，毋通及𪜶立約，嘛毋通手下留情。

3毋通及𪜶通婚；恁的查某子毋通嫁互𪜶的後生，嘛毋通互恁的後生娶𪜶的查某子。

4因為𪜶會互恁的子兒越走無敬拜上主，去服事別個神明，致到上主對恁發大受氣，真緊給恁消滅。

5所以恁著按呢對待𪜶：拆毀𪜶的祭壇，摃碎𪜶的石柱像，剉斷𪜶的亞舍拉女神的神像，用火燒𪜶雕刻的偶像。

6因為恁是歸屬上主 — 恁的上帝聖潔的子民；上主有對地上萬民的中間揀選恁，做伊特別的子民。

7上主疼恁，揀恁，毋是因為恁的人額比別族較多；其實恁的人額是萬族中上少的；

8是因為上主疼恁，閣欲實現伊對恁列祖立誓的應允，伊才用大權能的手導恁出來，救贖恁脫離埃及王法老的手，脫離做奴才的家。

9所以恁著知，只有上主 — 恁的上帝是上帝，是信實的上帝；對疼伊，遵守伊誡命的人，伊會守約，施慈愛互𪜶直到千代。

10所有拒絕伊的人，伊會給𪜶報應，給𪜶消滅；伊對拒絕伊的人會真緊當面給𪜶報應。

11所以，恁著切實遵行我今仔日所吩咐恁的誡命、規例、命令。

遵行誡命得著福氣(申 28.1-14)

12恁若切實遵行諸個命令，上主 — 恁的上帝就會守伊對恁的列祖立誓所立的約，對恁施慈愛。

13伊會疼恁，賜福恁，互恁興旺；嘛會佇伊對恁的列祖立誓欲賞賜恁的地，互恁生湠多多，閣互恁土地的出產、五穀、新酒及新油、牛仔子及羊仔子加添真多。

14恁得著的福氣會超過萬族；恁的男女無一個𣍐生，恁的牲生無一隻𣍐生湠。

15上主會互病疼離開恁；恁所知埃及逐款的歹症頭，伊𣍐降互恁，只有會降互所有怨恨恁的人。

16上主 — 恁的上帝交互恁的民族，恁著攏給𪜶消滅，毋通對𪜶手下留情；恁毋通服事𪜶的神明，因為按呢會致到恁受災難。

17恁若心內想講：「諸個國比阮較強，阮哪會當給𪜶趕走？」

18恁毋免驚𪜶；一定著會記得上主 — 恁的上帝對埃及王及攏總的埃及人所做的事，

19就是恁有親目看著的大災難、神跡、奇事，閣上主 — 恁的上帝伸出大氣力的手導恁出來；伊嘛會按呢對待恁所驚的民族。

20上主 — 恁的上帝欲降瘟疫佇𪜶中間，直到許個賰落來走去匿的人佇恁的面前消滅。

21恁毋免驚𪜶，因為及恁同在的上主 — 恁的上帝，是偉大閣通驚畏的上帝。

22上主 — 恁的上帝會佇恁的面前漸漸將諸個民族趕走；恁毋通真緊給𪜶消滅，才免野獸加添真多煞傷害著恁。

23上主 — 恁的上帝會將諸個民族交佇恁的手，互𪜶大驚擾亂，直到𪜶滅亡；

24閣會將𪜶許個王交佇恁的手，互𪜶對世間消失；無一個人會當對抗恁，直到恁給𪜶消滅。

25恁著將𪜶雕刻的神像用火燒掉；毋通貪神像身上的金銀，嘛毋通提來做家己的，才免恁因為按呢受災難；因為諸個是上主 — 恁的上帝所厭惡的。

26任何偶像，恁攏毋通帶入恁的厝，才免恁及許個物像款成做著毀滅的。恁著徹底厭惡諸個物，因為諸個是著毀滅的。