詩篇 51 - 現代台語譯本漢字版(TTVH)-闽南语

大闢及拔示芭同房以後，先知拿單來見伊，伊做此首詩，交互聖樂長。祈求赦免

1上帝啊，你的疼𣍐改變，求你憐憫我！

你有豐富的慈愛，求你擦消我的罪過！

2求你洗除我一切的罪，

洗清我的罪惡。

3我知家己的過失；

我的罪惡不時佇我的目睭前。

4我有得罪你，我得罪的是你；

我有做你看做邪惡的代誌。

所以，我受你審判是當然，

受你責罰是應該。

5我佇母胎就有罪，

出世彼日就是罪人。

6你意愛的是內心誠實；

求你教示我，互我心內有真正的智慧。

7求你洗除我的罪，互我清氣；

求你給我洗清氣，互我比雪較白。

8求你互我聽見歡喜快樂的聲，

互你拍碎的骨頭閣再歡喜快樂。

9求你面越走無看我的罪；

求你擦消我一切的罪惡。

10上帝啊，求你為我創造純潔的心；

求你賜我新閣忠誠的心靈。

11毋通趕我離開你的面前；

毋通對我收回你聖的神。

12求你互我重新享受你救恩的歡喜，

互我的心靈願意順服你。

13我欲將你的道路指示犯過失的人，

互罪人通歸向你。

14拯救我的上帝啊，求你免除我的死罪，

互我通大聲稱讚你的拯救。

15主啊，求你開我的嘴；

我欲稱讚你。

16你無愛牲禮，若愛，我歡喜獻；

我若獻燒化祭，你嘛無歡喜。

17上帝啊，你所愛的祭是痛悔的心靈；

憂傷痛悔的心，你歡喜接納。

18上帝啊，求你用慈愛好款待錫安，

重建耶路撒冷的城牆。

19彼時，你欲接納合宜的牲禮，全副的燒化祭；

人欲將牛獻佇你的祭壇。