詩篇 123 - 現代台語譯本漢字版(TTVH)-闽南语

𬦰崎上耶路撒冷的詩。求上主憐憫

1坐佇天頂寶座的上主啊，

我攑目向你。

2看啊，僕人的目睭按怎仰望主人的手，

女婢的目睭按怎仰望女主人的手，

阮的目睭嘛按呢仰望上主 — 阮的上帝，

一直到伊憐憫阮。

3上主啊，憐憫阮，憐憫阮，

因為阮互人看輕到忍受𣍐牢。

4阮已經無法度忍受自滿的人的冷笑，

無法度忍受自高的人的藐視。