1耶穌閣給𪜶講：「我實在給恁講，徛佇遮的人，有的猶未死以前會看見上帝國已經充滿大能力來臨。」
耶穌改變形像(太 17.1-13；路 9.28-36)2六日後，耶穌導彼得、雅各，及約翰，干焦𪜶家己𬦰上一座高山。佇𪜶的面前，耶穌的形像忽然改變。
3伊的衫變到光映映，非常白，地上的漂布師傅嘛𣍐當漂到赫呢白。
4彼時以利亞及摩西做夥出現，及耶穌講話。
5彼得對耶穌講：「拉比，咱佇遮真好，阮來搭三間寮仔，一間互你，一間互摩西，一間互以利亞。」
6彼得毋知著講什麼，因為𪜶非常驚惶。
7彼時，有一片雲給𪜶罩啲，閣有聲對雲出來，講：「此個是我所疼的子，恁著聽趁伊。」
8𪜶趕緊四周圍看一輪，只有看著耶穌，無別人佇遐。
9𪜶落山的時，耶穌命令𪜶，講：「人子對死人中閣活以前，毋通將所看見的事給人講。」
10𪜶將耶穌的話囥佇心內，私下啲議論對死人中閣活此句話是什麼意思。
11𪜶問耶穌：「是按怎經學教師講以利亞一定著先來？」
12耶穌應講：「以利亞一定著先來回復一切。按呢，聖經哪會記載講人子一定著受真多苦難閣互人藐視？
13我給恁講，抵抵照聖經所記載，以利亞已經來啦，人照𪜶的意思對待伊。」
耶穌醫好邪神附身的囝仔(太 17.14-21；路 9.37-43)14𪜶來到其他的門徒遐，看著一大群人給𪜶圍啲，有幾若個經學教師及𪜶啲辯論。
15群眾一下看著耶穌，真著驚，隨時走倚去給伊請安。
16耶穌問門徒講：「恁及𪜶啲辯論什麼？」
17群眾的中間有一個應伊講：「老師，我導我的子來尋你，伊互鬼附身𣍐講話。
18無論佇叨位，鬼一下附身，給伊摔倒，伊就哹白波涎，咬嘴齒根，歸身軀硬硞硞。我請你的門徒給鬼趕出去，𪜶攏無法度。」
19耶穌給𪜶講：「唉啊，毋信的世代！我著及恁住偌久？我著閣忍耐恁偌久？給伊導來我遮。」
20𪜶就給伊導來。
彼個鬼一下看著耶穌，隨時互彼個囝仔抽惙，倒佇土腳翱來翱去，哹白波涎。
21耶穌問伊的老父：「伊按呢偌久啊？」
伊應講：「對細漢就按呢。
22鬼定定給伊㧒落火，捙落水，欲給伊害死。你若會，求你可憐阮，幫贊阮！」
23耶穌給伊講：「你哪講『你若會』？有信的人逐項攏會。」
24囝仔的老父隨時喝講：「我信！我的信無夠，求你幫贊！」
25耶穌看著群眾走倚來，嚴嚴責備彼個邪神，講：「你此個啞口閣臭耳的鬼，我命令你對此個囝仔出來，毋准你閣入去！」
26鬼大聲喝，互彼個囝仔大抽惙才出去。彼個囝仔變做及死人像款，所以大部分的人講：「伊死去啦。」
27總是耶穌牽囝仔的手，給伊扶起來，伊就起來。
28耶穌入去厝內，伊的門徒私下給伊問：「是按怎阮無法度給鬼趕出去？」
29耶穌應講：「此種鬼只有靠祈禱才趕會出去。」
耶穌閣預告家己的死及閣活(太 17.22-23；路 9.43-45)30耶穌及門徒離開遐，經過加利利。耶穌無愛人知伊佇叨位，
31因為伊抵啲教示門徒，對𪜶講：「人子會互人出賣，𪜶會給伊害死，死了三日後會閣活。」
32𪜶𣍐明白此句話，閣毋敢給伊問。
什麼人上大(太 18.1-5；路 9.46-48)33𪜶來到迦百農。耶穌佇厝裡的時問門徒講：「恁佇路中啲議論什麼？」
34𪜶攏恬恬，因為佇路中𪜶互相啲爭論什麼人上大。
35耶穌坐落去，叫十二使徒來，對𪜶講：「若有人欲做第一，著做眾人的上路尾，做眾人的差用。」
36伊就牽一個囝仔來，互伊徛佇𪜶中間，給伊抱起來，對𪜶講：
37「無論什麼人若為著我的名接納一個此款囝仔，就是接納我。接納我的，毋是接納我，是接納差我來彼位。」
無反對咱就是為咱(路 9.49-50)38 約翰對耶穌講：「老師，阮有看著一個人奉你的名趕鬼，阮給伊阻擋，因為伊無啲隨咱。」
39耶穌講：「毋通給伊阻擋，因為無人會奉我的名行神跡，隨時閣講我的歹話。
40無反對咱的就是為咱。
41我實在給恁講，無論什麼人，因為恁屬基督，用一杯水互恁飲，伊一定會得著報賞。」
引起人犯罪(太 18.6-9；路 17.1-2)42耶穌講：「無論什麼人互信我的人中間微細的一個犯罪，伊較好互人用大石磨給伊吊佇頷頸，㧒落海。
43「你的手若互你犯罪，著斬㧒确，寧可減一支手入永遠活，比雙手好好落地獄互𣍐化的火燒較好。
45你的腳若互你犯罪，著斬㧒确，寧可減一支腳入永遠活，比雙腳好好互人㧒落地獄較好。
47你的目睭若互你犯罪，著挖㧒确，寧可減一蕊目睭入上帝國，比兩蕊目睭好好互人㧒落地獄較好。
48佇地獄，蟲𣍐死，火𣍐化。
49「逐個人攏著用火煉，親像用鹽䜻。
50鹽真有路用；毋拘鹽若失去鹹味，欲按怎閣互伊鹹？恁家己著有鹽的作用，互相和好。」
Who We AreWhat We EelieveWhat We Do
2025 by iamachristian.org,Inc All rights reserved.
