何西阿書 13 - 現代台語譯本漢字版(TTVH)-闽南语

以色列最後的審判

1早前以法蓮支族一下講話，人攏皮皮惙；

伊佇以色列中受尊重。

毋拘伊拜巴力，犯罪致到死。

2𪜶犯罪，愈犯愈多；

𪜶用銀為著家己造偶像；

師傅照𪜶的想法鑄造。

偶像攏是人造的。

𪜶講：「咱來對牛仔像獻祭，

閣給𪜶唚。」

3按呢，𪜶會親像早起時的霧，

親像清早的露水，真緊就焦去；

親像五穀場的粗糠，

親像對窗仔淐出來的煙，

風一下吹就消失。

4對你出埃及地的時，

我就是上主 — 你的上帝；

我以外你毋通認別個做上帝；

我以外無救主。

5佇曠野焦燥的地，

我就識你，照顧你。

6我養飼諸個人民，互𪜶食飽；

𪜶一下食飽就自高，

煞𣍐記得我。

7所以，我欲親像獅攻擊𪜶，

親像豹匿佇路邊當等𪜶。

8我欲給𪜶攻擊：

親像失落子的熊母拆裂𪜶的胸坎；

親像獅母給𪜶吞食；

親像野獸給𪜶拆碎。

9 以色列啊，我欲給你毀滅；

啥人會當幫贊你？

10你討欲愛有王及領袖來救你。

今王佇叨位？

許個城的領袖佇叨位？

11我佇受氣中替恁設立王，

嘛佇大受氣中給伊廢除。

12 以法蓮的罪過攏有記錄，

伊的罪惡攏有保存。

13伊會受催陣的痛疼；

伊親像戇子，

出世的時已經到，猶匿佇子宮口毋出來。

14我豈著救𪜶脫離陰府的權勢？

我豈著贖回𪜶脫離死亡？

死亡啊，你的災害佇叨位？

陰府啊，你的毀滅佇叨位？

我一定無欲憐憫𪜶。

15雖然以法蓮比別個支族較繁榮，

毋拘上主會互強烈的東風對曠野吹來。

伊的水泉會焦去，

水源會斷去。

伊所積聚一切的財寶攏會受搶奪。

16 撒馬利亞人著擔當背逆上帝的罪；

𪜶會倒佇刀下；

𪜶的嬰仔會互人摔死；

有身的婦仁人的腹肚嘛會互人破開。