以西結書 15 - 現代台語譯本漢字版(TTVH)-闽南语

葡萄樹的譬喻

1上主對我講：

2「人子，葡萄樹豈有比其他的樹較好？葡萄樹枝豈會比樹林內其他的樹枝較有路用？

3葡萄樹枝豈會當提來做什麼？伊豈會當做掛物件的柴釘仔？

4伊干焦會當燃火。伊兩頭攏𤏸火，中箍嘛燒起來，豈猶有什麼路用？

5伊好好的時都無什麼路用，今互火燒，燒甲臭焦，豈猶會當提來做什麼？」

6所以，至高的上主按呢講：「我按怎互樹林內的葡萄樹做火柴燒，嘛欲按呢對待耶路撒冷的住民。

7我欲變面及𪜶作對；𪜶雖然對火中走出來，火猶原欲給𪜶燒滅。我對𪜶變面的時，恁就知我是上主。

8因為𪜶對我不忠，所以我欲互𪜶的土地拋荒。」至高的上主按呢宣告。