詩篇 112 - 現代台語譯本漢字版(TTVH)-闽南语

敬畏上帝的人有福氣

1哈利路亞，稱讚上主！

敬畏上主，深深意愛伊誡命的，

此款人真有福氣！

2𪜶的子孫佇以色列地一定強盛；

正直的人的後代一定受祝福。

3𪜶的家內充滿財富；

𪜶的好行為存到永遠。

4正直的人佇烏暗中有光啲照𪜶；

𪜶有恩惠，有憐憫，有公義。

5慷慨借人閣公正處理家己的代誌的，

此款人事事順利。

6義人絕對𣍐失敗；

𪜶永遠互人數念。

7歹消息，𪜶攏毋驚，

因為心堅定，倚靠上主。

8𪜶的心自在，攏𣍐驚惶，

最後會看著對敵互上主拍敗。

9𪜶慷慨賑濟散赤人；

𪜶的好行為存到永遠。

𪜶的頭會當攑高，受人尊敬。

10歹人看了大受氣，

咬牙切齒，向望攏無去。

歹人的心願攏落空。