西番雅書 1 - 現代台語譯本漢字版(TTVH)-闽南语

1 亞們的子約西亞作猶大王的時，上主對希西家的元孫，亞瑪利雅的曾孫，基大利的孫，古示的子西番雅講諸個話。

上主審判的日

2上主講：

我欲對地上徹底除滅萬物。

3我欲除滅人及牲生，

除滅空中的鳥及海裡的魚。

我欲互歹人跋倒𣍐閣起來，

欲對地上毀滅全人類。

上主按呢宣告。

4我欲伸手攻擊猶大，

攻擊耶路撒冷所有的住民。

我嘛欲對此個所在毀滅猶啲拜巴力的人，

以及服事偶像的祭司。

5所有佇厝頂拜天頂萬象的，

及許個敬拜上主指我咒誓，像時閣指神明米勒公

咒誓的，

6以及背叛上主，無尋求我，無求我幫贊的人，

我攏欲給𪜶毀滅。

7你著佇至高上主的面前肅靜，

因為上主的日啲欲到啦。

上主已經準備欲犧牲伊的子民，

欲叫對敵來吞食猶大。

8上主講：

「佇獻祭的日，

我欲刑罰貴族及王的眾子，

以及攏總穿外邦人的衫的。

9彼日，我欲刑罰一切迒過戶橂，

互主人的厝充滿強暴及詭詐的人。」

10上主講：

「彼日，佇魚門有喝咻，

佇新的城區有哀哭，

對山頂有山崩的聲發出。

11住佇低的城區的人啊，著哀叫，

因為生理人攏會消滅，

用銀買賣的有錢人攏會受剿滅。

12彼時我欲佇耶路撒冷攑燈抄尋；

我欲刑罰許個自滿自大的人，

𪜶想講『上主𣍐賜福，嘛𣍐降災』。

13𪜶的財物會互人搶去，

𪜶的厝宅會荒廢；

𪜶起厝，𣍐當住；

栽種葡萄，嘛無酒通飲。」

14上主的大日子近啦，

真近，連鞭就到。

聽咧，上主的日是痛苦的日，

勇士都會艱苦哀叫。

15彼日是上主大受氣的日，

患難困苦的日，

大災難青凊的日，

烏烏暗暗的日，

烏雲蓋密的日，

16歕哨角哄喝的日；

對敵欲攻擊堅固的城，

攻擊城角的高塔。

17我欲互人抵著困苦，

互𪜶親像失明的人行路，

因為𪜶得罪上主；

𪜶的血會受摒出親像啲摒土粉，

腸仔腸肚互人㧒确親像啲㧒糞埽。

18上主大受氣的日，人的金銀𣍐當救𪜶。

全地會互上主猛烈受氣的火吞滅，

因為伊會真緊剿滅地上所有的住民。