歷代志下卷 25 - 現代台語譯本漢字版(TTVH)-闽南语

猶大王亞瑪謝(王下 14.2-6)

1 亞瑪謝坐位的時二十五歲，佇耶路撒冷作王二十九年；伊的老母叫做約耶但，是耶路撒冷人。

2亞瑪謝做上主看做好的事，毋拘心無專一。

3伊的王權一下堅固，就將刣死伊老父猶大王許個人臣處死。

4毋拘伊無刣死許個人臣的子兒，是照摩西律法的冊所記載上主的命令：毋通因為子兒的所做給老父處死，嘛毋通因為老父的所做給子兒處死；逐個人著因為家己的罪死。

及以東交戰(王下 14.7)

5 亞瑪謝召集猶大人民，照宗族佇猶大及便雅憫支族設立導一千人抑是一百人個軍官。伊點算二十歲以上特選的兵有三十萬人；𪜶攏會當攑槍，提盾牌出戰。

6伊閣用三千四百公斤的銀，對北國以色列倩十萬個勇猛的戰士。

7有一個上帝重用的人來見伊講：「王啊，毋通互以色列的軍兵及你做夥去；因為上主無及以色列人，就是以法蓮的後代同在。

8你若一定欲按呢做，無論你按怎奮勇作戰，上帝嘛會互你刣輸；因為上帝會當互人贏，嘛會當互人輸。」

9 亞瑪謝問上帝重用的人講：「我已經用三千四百公斤的銀互以色列的軍隊，許個銀欲按怎？」

上帝重用的人應講：「上主會互你閣較多。」

10亞瑪謝就解散對北國以色列來的軍兵，叫𪜶倒去𪜶兜；𪜶對猶大人真受氣，氣沸沸倒去𪜶兜。

11 亞瑪謝堅強起來，導伊的軍兵出去到鹽的山谷，刣死一萬個以東人。

12猶大人閣活掠一萬人，將𪜶帶到山崁頂面，對遐給𪜶捙落去，𪜶攏摔甲碎骨分屍。

13許個互亞瑪謝解散的以色列軍兵，煞攻擊撒馬利亞及伯‧和崙中間的猶大城鎮，刣死三千人，閣搶真多物件。

14 亞瑪謝刣贏以東人倒來，帶𪜶的神像，𫞼做神明，給𪜶跪拜燒香。

15因為按呢，上主對亞瑪謝發大受氣，就差一個先知去見伊，講：「許個外族的神明都𣍐當救𪜶的人民脫離你的手，你是按怎求問𪜶？」

16伊及王講話的時，王給伊截話講：「恬去！啥人設立你做王的參謀？你愛死噢？」

先知就恬去，毋拘閣講：「我知上帝決定欲給你消滅，因為你做此個代誌，閣毋聽我的勸戒。」

及以色列交戰(王下 14.8-20)

17彼時，猶大王亞瑪謝及伊的參謀參詳了，派使者去見耶戶的孫，約哈斯的子，以色列王約華施，講：「來，咱來戰場拼輸贏。」

18 以色列王約華施派使者去給猶大王亞瑪謝講：「黎巴嫩的草刺差使者去見黎巴嫩的柏香樹，講：『你的查某子互我的子做某！』後來黎巴嫩有一隻野獸經過，給草刺踐踏。

19你已經刣贏以東，心就驕傲聳勢。你𫢶恁兜享受你的榮光就好，哪欲惹災禍，互你本身及猶大國做夥滅亡？」

20毋拘亞瑪謝聽𣍐落去；此個代誌是出佇上帝，欲將𪜶交互對敵，因為𪜶求問以東的神明。

21對按呢，以色列王約華施上來，佇猶大的伯‧示麥及猶大王亞瑪謝交戰。

22猶大互以色列拍敗，逐個人走倒去𪜶兜。

23以色列王約華施佇遐掠著猶大王亞瑪謝，伊是約哈斯的孫，約阿施的子，給伊帶到耶路撒冷，閣拆毀耶路撒冷的城牆，對以法蓮門到角門，約兩百公尺。

24約華施將王宮的財寶，及俄別‧以東的後代所顧守上帝聖殿的金、銀、器具攏提去，閣掠人做人質，才倒去撒馬利亞。

25 約哈斯的子以色列王約華施死了，約阿施的子猶大王亞瑪謝閣再活十五年。

26亞瑪謝其他的事蹟，對頭到尾攏記載佇猶大及以色列列王史。

27對亞瑪謝偏離無隨上主了後，佇耶路撒冷有人計謀欲害伊，伊就逃走去拉吉。𪜶派人趇到拉吉，佇遐給伊刣死。

28人用馬載伊的屍體倒來，將伊安葬佇猶大的城，列祖的墓地。