歷代志下卷 27 - 現代台語譯本漢字版(TTVH)-闽南语

猶大王約坦(王下 15.32-38)

1 約坦坐位的時二十五歲，佇耶路撒冷作王十六年；伊的老母叫做耶露莎，是撒督的查某子。

2約坦做上主看做好的事，照伊的老父烏西亞的所做去做，不過無親像伊的老父入去上主的殿燒香。人民的所做猶原敗壞。

3約坦起上主聖殿的上門，佇耶路撒冷的俄斐勒擴建城牆，

4閣佇猶大山地起城，佇樹林內起要塞及守望台。

5伊及亞捫人的王交戰，得著勝利。彼年，亞捫人進貢銀三千四百公斤，大麥及小麥各一千公噸；第二年，第三年，嘛按呢進貢。

6約坦漸漸強盛，因為伊堅定順服上主 — 伊的上帝。

7約坦其他的事蹟、戰爭的記錄，及伊的所做，攏記載佇以色列及猶大列王史。

8伊坐位的時二十五歲，佇耶路撒冷作王十六年。

9約坦轉去伊的列祖遐，安葬佇大闢城。伊的子亞哈斯續接伊作王。