1我看見另外一個大氣力的天使對天頂落來；伊用雲作衫穿，頭殼頂有虹，伊的面親像日頭，腳親像火柱。
2伊的手有提一卷搋開的細卷冊。伊正腳踏海，倒腳踏地。
3伊大聲喝，親像獅啲哮，彼七個雷就出聲應。
4七個雷出聲了後，我抵欲寫，聽見對天有聲講：「七個雷所講的，你著封起來，毋通記錄。」
5後來，我所看見腳踏海及地彼個天使攑正手指天，
6指彼位永永遠遠活啲的上帝，就是創造天及天頂的物、地及地上的物、海及海裡的物的，宣布講：「𣍐閣延遲啦！
7不過第七個天使啲欲歕伊的喇叭，喇叭的聲彈的日，上帝對伊的僕人眾先知所宣告的奧妙會實現。」
8後來，我前所聽見對天來彼個聲閣一遍對我講：「你去，去提腳踏海及地彼個天使手中彼卷搋開的冊。」
9我就去天使遐，請伊將彼卷細卷冊互我；伊給我講：「你提去，食落去，佇腹肚內會苦，毋拘佇嘴內會親像蜜赫呢甜。」
10我就對天使的手提彼卷細卷冊來食；嘴內果然親像蜜赫呢甜，毋拘吞落去腹肚內就變做苦。
11天使閣給我講：「你著閣宣布上帝關係真多民族、邦國、語言，及君王的預言。」
Who We AreWhat We EelieveWhat We Do
2025 by iamachristian.org,Inc All rights reserved.
