1「你給亞倫及伊的子分別作聖，互𪜶做祭司服事我的時，著按呢做：著牽一隻公的牛仔、兩隻無瑕疵公的綿羊，
2閣著提用幼麵粉做的無酵餅、抄油的無酵餅，及抹油的無酵薄餅。
3諸個餅著下佇一跤籃仔帶來，閣牽彼隻牛仔及兩隻綿羊來，獻互上主。
4「著互亞倫及伊的子來到會幕的入口，用水給𪜶洗。
5著給亞倫穿內袍、掛以弗得的外袍、以弗得、胸袋，將用奇巧的手路織的以弗得的帶給伊縖啲；
6閣給伊戴禮帽，將彼塊刻『聖化歸上主』的金牌縛佇禮帽的頂面，
7然後，用通抹的聖油倒佇伊的頭殼，給伊按立。
8「著叫亞倫的子來，給𪜶穿內袍，
9縖腰帶，包頭巾，𪜶就擔當祭司的職份。這就成做永遠的規例。
「你著按呢給亞倫及伊的子授職。
10「你著給彼隻公的牛仔牽來會幕頭前；亞倫及伊許個子著按手佇牛的頭殼。
11你著佇上主的面前，佇會幕的入口，刣彼隻牛，
12用指頭仔搵血，抹佇祭壇頂面四支翹起來的角；將賰的血倒佇祭壇腳。
13著將腹內所有的油、肝的網紗、兩粒腰子，以及腰子頂面的油，攏下佇壇頂燒。
14毋拘牛的肉、皮，及糞，攏著佇營外燒掉。這是贖罪祭。
15「你著牽一隻公的綿羊來；亞倫及伊的子著按手佇彼隻羊的頭殼。
16著刣彼隻羊，將羊的血灑佇祭壇的四周圍。
17著將羊切一塊一塊，給腹內及腿洗清氣，及歸塊歸塊的肉以及頭下做夥。
18著將歸隻羊下佇祭壇頂燒；這是獻互上主的燒化祭，是用火燒獻互上主芳芳的祭物。
19「你著給第二隻公的綿羊牽來；亞倫及伊的子著按手佇羊的頭殼。
20你著刣彼隻羊，提一寡血，抹佇亞倫及伊許個子正旁的耳珠，閣抹佇𪜶正手及正腳的大頭姆；將賰的血灑佇祭壇的四周圍。
21你著提一寡壇頂的血及通抹的聖油，灑佇亞倫及伊的衫，閣灑佇伊的子及𪜶的衫；按呢，亞倫及伊的衫、伊許個子及𪜶的衫，就攏聖化歸上主。
22「你著取彼隻綿羊的油、肥的尾、腹內的油、肝的網紗、兩粒腰子及腰子的油，以及正腿；此隻是授職的時所獻的公的綿羊。
23你著閣對彼跤下佇上主面前貯無酵餅的籃仔，提一塊餅、一塊攪油的餅，及一塊薄餅，
24下佇亞倫及伊許個子的手，互𪜶佇上主的面前搖搖咧做祭物。
25你著對𪜶的手接過來，下佇壇頂燒化祭的頂面燒，做芳芳的祭獻互我。這是用火燒獻互上主的祭物。
26「亞倫授職的時所獻公的綿羊，你著提伊的胸坎肉，佇上主的面前搖搖咧做祭物；此份祭肉是你的。
27「授職的時所獻公的綿羊中間，搖過奉獻的胸坎肉，及提高奉獻的大腿，你著給𪜶聖化。此份祭肉是亞倫及伊許個子的。
28諸個部份是亞倫及伊的後代對以色列人得著的份額；此個著做永遠的規例。這是對以色列人平安祭的中間，提出來做奉獻互上主的禮物。
29「亞倫聖的禮服著留互伊的後代，互𪜶佇受抹油及接受祭司的職份的時通穿。
30續接伊做祭司彼個子，逐遍入會幕佇聖所服事的時，著穿禮服七日久。
31「授職的時所獻公的綿羊的肉，你著佇會幕的埕煮。
32亞倫及伊的子著佇會幕的入口食此隻羊的肉及籃仔內的餅。
33𪜶欲接受此個職份，受分別作聖，著食許個為著𪜶贖罪的物；毋拘其他的人毋通食，因為諸個食物是聖的。
34授職的時所獻的肉及餅，若留到隔早起，著用火燒掉；毋通食，因為是聖的物。
35「你著照我的吩咐，為著亞倫及伊許個子舉行授職的禮儀七日久；
36逐日著獻一隻公的牛做贖罪祭。嘛著為祭壇行潔淨禮，互伊清氣；閣給伊抹油分別作聖。
37你著為祭壇行潔淨禮七日久，給壇分別作聖，壇就成做至聖；所有摸著壇的攏成做聖。」
逐日著獻的祭(民 28.1-8)38「你逐日著佇祭壇奉獻兩隻一歲的羊仔；
39早起時獻一隻，黃昏的時閣獻一隻。
40你著用一公斤的幼麵粉及掙出來一公升的橄欖油抄做夥，及第一隻羊仔做夥獻，閣用一公升的酒做奠酒祭。
41你佇黃昏獻另外彼隻羊仔的時，著及早起時仝款獻素祭及奠酒祭，攏用火燒做芳芳的祭物獻互上主。
42恁世世代代，著照時佇會幕的入口獻燒化祭互上主；我欲佇遐及恁相會，及你講話。
43我欲佇遐及以色列人相會，會幕就因為我的榮光成做聖。
44我欲給會幕及祭壇分別作聖；嘛欲給亞倫及伊許個子分別作聖，互𪜶做祭司服事我。
45我欲𫢶佇以色列人的中間，做𪜶的上帝。
46𪜶會知，我是上主 — 𪜶的上帝！我導𪜶出埃及，所以我欲住佇𪜶中間。我是上主 — 𪜶的上帝。」
Who We AreWhat We EelieveWhat We Do
2025 by iamachristian.org,Inc All rights reserved.
