啟示錄 5 - 現代台語譯本漢字版(TTVH)-闽南语

冊及羊羔

1我看見坐佇寶座彼位的正手有一卷冊，內面外面攏有寫字，用七個印封啲。

2我閣看見一個有大氣力的天使，大聲宣布講：「什麼人有資格通搋開彼卷冊，拆開冊的封印？」

3佇天頂，佇地上，佇地下，攏無人會當搋開抑是讀彼卷冊。

4尋無一個人有資格搋開抑是讀彼卷冊，我就大聲哭。

5長老的中間有一個對我講：「毋通哭。你看，對猶大支族出來的獅，大闢的根，已經得勝，會當開彼卷冊及彼七個封印。」

6後來我看見羊羔徛佇寶座前，有四個活物及許個長老給伊圍啲。羊羔假若曾受殺害，有七支角，七蕊目睭，就是受差遣去普天下上帝的七個神。

7羊羔就進前，對坐佇寶座彼位的正手提彼卷冊。

8伊提著的時，彼四個活物及二十四個長老攏仆佇羊羔的面前，逐個有提琴及貯滿香的金爐；香就是信徒的祈禱。

9𪜶吟一首新的詩，講：

你有資格提彼卷冊，

拆開伊的封印；

因為你有受殺害，用你的血

對逐個族群、逐種語言、

逐個民族、逐個邦國

贖回人歸上帝。

10你互𪜶成做國度及祭司來服事咱的上帝；

𪜶會佇地上掌權。

11我閣看，我有聽見千千萬萬天使的聲音。𪜶攏圍佇寶座、活物，以及長老的周圍，

12大聲講：

受殺害的羊羔應該得著權能、

富裕、智慧、氣力、尊貴、榮光，及稱讚。

13我閣聽見，佇天頂，佇地上及地下，海裡及宇宙中一切的被造物攏講：

願稱讚、尊貴、榮光、權勢，

攏歸互坐佇寶座彼位及羊羔，

代代無盡！

14彼四個活物應講：「阿們！」許個長老就仆落去敬拜。