何西阿書 6 - 現代台語譯本漢字版(TTVH)-闽南语

以色列無真實悔改

1𪜶講：來啊，咱著回頭歸向上主；

伊拆裂咱，嘛欲醫好咱；

伊拍咱，嘛欲包咱的傷。

2過兩日，伊會互咱復原；

第三日，伊會互咱𬦰起來，

咱就會當佇伊的眷顧下生活。

3咱著認識上主，盡力追求來識伊；

伊會親像清早的光出現，

親像雨水臨到咱，

親像春雨潤澤土地。

4 以法蓮啊，我著按怎對待你？

猶大啊，我著按怎對付你？

恁對我的疼親像早起時的雲霧，

親像露水真緊焦去。

5因為按呢，我派先知給恁刜死，

用我的話給恁刣死；

我的審判親像清早的光發出。

6我較愛慈愛，無愛祭祀；

愛人真正識上帝，贏過獻燒化祭。

7毋拘𪜶親像亞當

背約，

對我無忠實。

8 基列是歹人的城；

𪜶的腳跡攏是刣人的血。

9祭司結黨，親像強盜，

佇示劍的路中埋伏，刣人，做邪惡的事。

10佇以色列家我看著通厭惡的事；

以法蓮犯淫行，

以色列沐垃墋。

11你咧，猶大，給你收割的時已經決定！

我欲互我的子民回復繁榮。