希伯來書 8 - 現代台語譯本漢字版(TTVH)-闽南语

咱的大祭司耶穌

1咱所啲講上要緊的是按呢：咱有此款的大祭司，伊坐佇天頂至大上帝寶座的正旁。

2伊佇聖所，就是真的帳幕，啲侍奉；此個帳幕毋是人，是主所搭的。

3逐個大祭司攏是為著獻禮物及祭品任命的；所以此位大祭司嘛一定著有什麼通獻。

4伊若佇地上就無作祭司，因為已經有祭司照律法啲獻禮物。

5𪜶所做的服事不過是天頂帳幕的副本及影像，抵照摩西欲起造會幕的時，上帝有給伊指示，講：「你著謹慎，一切著照佇山頂給你指示的模式來起。」

6毋拘現在耶穌已經得著閣較尊貴的侍奉，作較好的約的中間人；此個約是用較好的應允制定的。

7頭一個約若無缺點，就無需要立第二個約。

8毋拘上帝給𪜶指責講：

主講：看咧，日子啲欲到，

我欲及以色列家及猶大家立新的約。

9此個約無親像我以前及𪜶的祖先所立的，

就是牽𪜶的手，導𪜶出埃及的時所立的；

因為𪜶無繼續守我的約，

所以我毋插𪜶。

10主閣講：許個日以後，

我及以色列人所欲立的約是按呢：

我欲將我的律法囥佇𪜶的腦內，

寫佇𪜶的心內。

我欲做𪜶的上帝；

𪜶欲做我的子民。

11𪜶攏𣍐閣教示𪜶的同胞，

抑是家己的兄弟姊妹講：

著認識主，

因為𪜶對上細到上大的，

攏會認識我。

12我欲赦免𪜶的不義，

𣍐閣記得𪜶的罪惡。

13既然講到新的約，上帝就互頭一個約變做舊的。彼個漸漸舊啲衰退的約連鞭就消失。