創世記 47 - 現代台語譯本漢字版(TTVH)-闽南语

1 約瑟入去見埃及王，對伊報告，講：「我的老父及我的兄弟，帶𪜶的牛群、羊群，及一切所有的，對迦南地來佇歌珊地。」

2約瑟對伊的兄弟中間揀五個，導𪜶做夥去見埃及王。

3埃及王問約瑟的兄弟講：「恁啲做什麼工作？」

𪜶對埃及王講：「你的僕人是飼羊的人；阮及阮的祖先攏啲飼羊。」

4𪜶閣對埃及王講：「迦南地飢荒真傷重，你的僕人的羊群無草通食，所以阮來，向望會當寄居佇遮。今求你允准你的僕人住佇歌珊地區。」

5 埃及王給約瑟講：「你的老父及你的兄弟來到你遮；

6埃及地攏是你啲管理，你通互你的老父及你的兄弟住佇上好的地區；𪜶通住佇歌珊地區。你若知𪜶中間什麼人較有才調，通派𪜶眷顧我的牲生。」

7 約瑟導伊的老父雅各入去徛佇埃及王的面前；雅各就給埃及王祝福。

8埃及王問雅各講：「你現在幾歲？」

9 雅各對埃及王講：「我現在一百三十歲。我的人生的歲月短閣艱苦，不比我的祖先食長歲壽。」

10雅各閣給埃及王祝福了後，就離開埃及王出去。

11約瑟照埃及王的吩咐，互伊的老父及伊的兄弟住佇埃及上好的地區蘭塞的地，閣將彼個地區互𪜶做產業。

12約瑟用米糧奉待伊的老父，閣供給伊的兄弟，及𪜶老父所有的家屬，連上細漢的囝仔嘛在內。

飢荒

13飢荒真嚴重，全地攏無米糧；埃及地及迦南地因為飢荒荒廢。

14約瑟將埃及地及迦南地的人來買米糧的銀收集起來，攏送到埃及王宮。

15埃及人及迦南地的人的銀攏用了；埃及人民來見約瑟，講：「阮的銀攏用了了啦。求你互阮糧食；才免互你看著阮餓死。」

16 約瑟講：「恁若銀攏用了，通牽牲生來換米糧。」

17𪜶就將牲生趕來約瑟遐；約瑟用米糧換𪜶的馬、牛群、羊群，及驢仔；𪜶用所有的牲生換米糧，就按呢度過彼年。

18第二年，𪜶閣來見約瑟，講：「阮的主，阮無騙你，阮的銀攏用了，牲生嘛攏賣互你；除了阮的身軀及阮的田地以外，你嘛知，阮攏無半項啦。

19你豈忍心看阮人死，地拋荒？求你用米糧買阮及阮的地，阮及阮的地就攏歸屬埃及王。閣求你互阮種籽，阮才會當度活，免死，土地嘛免荒廢。」

20對按呢，約瑟為埃及王買全國的土地。埃及人因為飢荒嚴重，姑不將著賣𪜶的田地；許個地就攏歸屬埃及王。

21約瑟互埃及全國逐所在的人民攏成做奴隸。

22毋拘埃及王無買祭司的地；因為祭司有得著埃及王供給的糧食，所以𪜶無賣𪜶的地。

23約瑟給人民講：「我今仔日為埃及王買恁及恁的地。今，我將種籽互恁，恁通去種作。

24到收成的時，恁著納五分一互埃及王；四份歸恁，做園裡的種籽，閣做恁及恁全家，以及恁的囝仔的食物。」

25𪜶講：「阮的性命是你救的，阮真感激，願意做埃及王的奴隸。」

26按呢，約瑟為埃及制定一個條例，到今仔日猶啲實施，就是收成的五分一著納互埃及王，毋拘祭司的地無歸埃及王。

雅各最後的吩咐

27 以色列人住佇埃及的歌珊地區，佇遐建置家業，生湠真多。

28雅各住佇埃及十七年。伊一生活一百四十七歲。

29雅各知伊死的日近啦，就叫伊的子約瑟來，講：「你若真正有孝我，請將你的手下佇我的大腿下咒誓，忠誠答應我，無給我埋葬佇埃及。

30我轉去我的祖先遐的時，你著將我帶離開埃及，埋葬佇𪜶安葬的所在。」

約瑟講：「我會照你講的去做。」

31 雅各講：「你著對我咒誓。」約瑟就對伊咒誓。對按呢雅各倚床頭敬拜。