以賽亞書 46 - 現代台語譯本漢字版(TTVH)-闽南语

巴比倫的偶像

1 彼勒跪落去啦，尼波仆落去啦！

諸個巴比倫的神明下佇走獸及牲生的尻脊骿。

恁啲扛的偶像成做厭倦的牲生的重擔。

2𪜶已經攏跪落去，仆落去，

無法度救家己，

顛倒互敵人搶去做戰利品。

3 雅各留落來的子孫，

以色列人啊，恁攏著聽！

恁一下出世我就一直給恁抱，

對出母胎就給恁揹。

4到恁年老，我攏像款；

到恁頭毛白，我猶會給恁扶持。

我創造恁，會給恁抱；

我會繼續給恁揹，給恁解救。

5上主講：

恁欲用啥人及我比，及我並？

啥人親像我，會當及我像款？

6人對袋仔摒歸堆金仔出來，

用秤仔秤銀。

𪜶倩師傅用諸個金銀鑄造神像，

然後仆落去跪拜。

7𪜶將偶像夯起來，囥佇肩頭頂扛，

給伊𫞼佇一個所在，

互伊𣍐當離開本位。

人給伊求叫，伊攏𣍐應答；

伊嘛無法度救人脫離災難。

8有罪的人啊，著記互牢；

背叛的人啊，著好好想。

9著會記得古早發生的代誌。

我是上帝，其他無別個；

我是上帝，無一個會當及我比。

10對起初我就預測終局的事；

對古早我就宣告猶未發生的代誌。

我講：我的計劃𣍐改變；

我愛做的事，一定會互伊實現。

11我欲差一個使者對東方真遠的所在來；

伊欲親像鷹鳥衝落來。

我已經講出嘴，一定欲實現；

我已經計劃，一定欲完成。

12恁諸個心硬，

想講勝利無望的人，

著聽我講。

13我欲互勝利逼近，連鞭到；

我的拯救𣍐延遲。

我欲解救耶路撒冷，

欲互以色列得著榮光。