希伯來書 12 - 現代台語譯本漢字版(TTVH)-闽南语

咱的天父上帝

1既然有即呢多的見證人親像雲給咱包圍啲，咱著排除一切的阻礙及一直啲纏絆咱的罪，堅忍跑走頭前的路程。

2著注神看耶穌，伊是信的創始者及完成者。伊為著排佇頭前的喜樂，無視凌辱，忍受十字架的苦難，現在已經坐佇上帝寶座的正旁。

3著詳細想此個人的所做，恁才𣍐灰心失志。伊按怎忍受罪人對伊的忤逆。

4恁及罪惡鬥爭猶未抵抗到死的程度。

5恁豈𣍐記得上帝苦勸恁親像啲苦勸子兒。伊講：

我的子啊，毋通看輕主的管教；

受伊責備嘛毋通灰心。

6因為主管教伊所疼的人，

鞭拍伊所接納的逐個子兒。

7著忍受管教。上帝款待恁親像子兒。豈有子兒無受父母管教？

8恁若無受所有的子兒所受的管教，恁就是私生子，毋是真正的子兒。

9受肉體的父母管教，咱都尊重𪜶，何況受靈性的父管教，咱豈毋應該閣較願意順從來得著活命？

10肉體的父母暫時久照家己的意思管教，毋拘上帝的管教是欲互咱得著利益，目的是欲互咱有份佇伊的聖潔。

11咱逐遍受管教𣍐感覺歡喜，反轉憂傷；毋拘經過管教鍛鍊了後，會結和平的果子，行做正直。

教導及警戒

12所以，恁諸個腳痠手軟的人著堅強起來。

13著修直恁欲行的路，才免互跛的腳脫輪，反轉得著醫好。

14著勞力及眾人和睦，過聖潔的生活；若無，無人會見著主。

15著謹慎，才免有人失去上帝的恩典；才免有毒草發起來，造成危害，致到真多人受污染；

16才免有人淫亂，無敬畏上帝，親像以掃為著一頓食出賣大子的名份。

17恁知，後來伊愛得著祝福的時受拒絕；雖然伊流目屎懇求嘛無得著，因為伊尋無機會通悔改。

18恁毋是來到彼個摸會著的西奈山，佇遐有火焰、密雲、烏暗，及暴風，

19閣有喇叭的響聲及講話的聲。聽見的人懇求上帝毋通閣對𪜶講話，

20因為𪜶𣍐當忍受命令𪜶的話，講：「連走獸若磕著山嘛著用石頭抌死。」

21彼個景象非常通驚，致到摩西講：「我驚甲皮皮惙。」

22毋拘，恁是來到錫安山，永活上帝的城，天頂的耶路撒冷，佇遐有千千萬萬的天使聚集慶祝。

23恁來到上帝的大子聚集的會所；𪜶的名已經記佇天頂。恁來到審判萬人的上帝面前，到已經得著改造成做完全的義人的靈魂遐。

24恁來到新的約的中間人耶穌的面前，及所灑的血遐，此個血比亞伯的血所表達的閣較好。

25著謹慎，毋通拒絕啲對恁講話彼位。許個拒絕佇地上警戒𪜶彼位的人都𣍐當脫離罪，咱若拒絕對天頂警戒咱彼位，閣較𣍐當脫離。

26彼時伊的聲搖動大地，毋拘今伊有應允講：「閣一遍，我毋若互地，嘛欲互天搖動。」

27「閣一遍」此句話指明，許個受造的物受搖動，受遷徙，是欲互許個無受搖動的留落來。

28所以，咱著感謝，因為咱有得著彼個𣍐受搖動的國度。咱著照上帝所歡喜的，用虔誠及敬畏來服事伊，

29因為咱的上帝是吞滅的火。