詩篇 55 - 現代台語譯本漢字版(TTVH)-闽南语

大闢教示的詩，交互聖樂長；用弦的樂器伴奏。受出賣的人的祈禱

1上帝啊，求你俯耳孔聽我的祈禱，

毋通匿起來，毋聽我的懇求。

2求你聽我，應我；

我操煩鬱卒，心不安，

3攏是因為對敵哄喝，歹人壓制；

𪜶將罪過疊起來硩我；

𪜶發受氣窘迫我。

4我的心攪絞痛苦；

死亡的驚惶臨到我。

5驚惶愕愕惙包圍我；

恐怖蓋密我。

6我講：「我真愛親像粉鳥有翼，

通飛去尋著安歇的所在。

7我欲飛去遠遠，

歇佇曠野，

8緊到避難的所在，

通脫離狂風暴雨。」

9主啊，求你拍亂𪜶的語言，互𪜶的話混亂；

因為我看著城內有強暴紛爭，

10歹人暝日佇城牆頂行踅，

城內充滿災難邪惡。

11城內到處有破壞；

街路逐位有壓制及奸詐。

12侮辱我的毋是對敵，

若是，我嘛猶會當容忍。

自高看輕我的毋是怨恨我的人，

若是，我嘛猶會當閃開。

13無拍算是你，及我仝身份的人，

是我的同伴，我知己的朋友。

14咱以前常常互相親密談論，

及眾人佇上帝的殿做夥敬拜。

15願死亡忽然臨到𪜶，

互𪜶活活落陰府；

因為𪜶徛起的所在充滿邪惡。

16我咧，我欲求叫上帝；

上主會救我。

17下昏，早起，中晝，我哀傷吐氣；

伊攏會聽我的聲。

18雖然反對我的人真多，

伊會救贖我的性命脫離攻擊我的人，

互我平安倒轉來。

19對古早永遠存在的上帝會聽見，

嘛會給𪜶報應；

因為𪜶毋改變，無欲敬畏上帝。

20𪜶伸手攻擊家己的同伴，

違背及𪜶立的約。

21𪜶的嘴親像油滑溜溜；

𪜶的心藏怨恨；

𪜶的話比油較柔軟，

其實是拔出來的刀。

22著將你的擔卸互上主；

伊會扶持你，絕對𣍐互義人失敗。

23刣死人的及奸詐的人𣍐活到中年；

上帝啊，你會互𪜶陷落佇死亡的深坑。

若是我，我欲倚靠你。