哈巴谷書 3 - 現代台語譯本漢字版(TTVH)-闽南语

哈巴谷的祈禱

1先知哈巴谷的祈禱；調，用「離別」。

2上主啊，我聽著你的名聲及你的所做就驚惶。

上主啊，求你佇阮的世代互阮閣看見你偉大的作為，

佇你大受氣的時，求你會記得憐憫阮！

3上帝對提幔來，

神聖的上帝對巴蘭山落來。

伊的榮光蓋滿天；

稱讚伊的聲充滿全地。

4伊的燦爛親像日光；

伊的手掌握氣力，

對遐射出熠爁。

5瘟疫行佇伊的頭前，

熱病隨佇伊的後面。

6伊徛啲，大地就振動；

伊一下看，列邦就皮皮惙。

萬年的大山崩落來；

千古的小山沉落去。

上帝的所行所做，永遠無改變。

7我看著古珊的布棚受拆毀，

米甸人住的所在受毀壞。

8上主啊，你騎馬，坐得勝的戰車來，

豈是啲對溪發受氣，

對江河起性地，

對海洋發大受氣？

9你的弓攏攑出來，

箭嘛已經安好勢。

你用江河分開大地。

10山嶺看著你攏驚惶；

大水沖過，

深淵出大聲，

大湧淐高。

11你的箭射出光，

你的槍焰焰熠，

日及月煞停佇原位。

12你發受氣遍行全地；

你大受氣踐踏列國。

13你出來欲解救你的子民，

拯救你選立的王。

你拆毀歹人的厝頂，

拆甲連地基都露現。

14你用槍鑿迵𪜶的戰士的頭；

𪜶來親像暴風給我吹走；

𪜶愛佇暗中吞食困苦人。

15你騎馬衝過大海，

互海水絞滾夯湧。

16我一下聽著，歸身軀皮皮惙；

彼個聲互我的嘴唇㘈㘈顫，

骨頭酥去，腳徛𣍐牢。

我干焦會當恬恬仔聽候

攻擊阮的人抵著災難的日來臨。

17雖然無花果樹無茁芛，

葡萄樹無結果子，

橄欖樹無收成，

田園無出五穀，

椆內無半隻羊，

牛椆嘛無牛，

18我猶久欲因為上主來歡喜，

因為救我的上帝來快樂。

19至高的上主是我的氣力；

伊互我的腳親像鹿母𠢕走，

互我佇高的所在腳步安穩。

交互聖樂長，用弦樂伴奏。