1著聽上主啲講的話：
起來，佇大山面前提出答辯，
互小山聽著恁的聲。
2大山及地堅固的根基啊，
著聽上主的控訴；
上主欲及伊的子民爭辯，
欲控告以色列。
3我的子民啊，我有對恁做什麼？
我有什麼互恁為難？
恁來答辯。
4我有導恁出埃及，
救贖恁脫離做奴才的地；
我差摩西、亞倫、美莉安做頭導恁。
5我的子民啊，著會記得摩押王巴勒的計謀，
及比珥的子巴蘭應伊的話，
會記得對什亭到吉甲發生的代誌，
通互恁知上主公正的作為。
上主的要求6我著帶什麼就近上主，
帶什麼來敬拜至高的上帝？
豈著用燒化祭，
抑是一歲的牛仔來就近伊？
7上主豈會歡喜千千隻的羊，
抑是萬萬條溪的油？
我豈著為家己的罪過獻大子，
為我的罪惡獻我的親生子？
8人啊，上主已經有指示你什麼是好。
伊要求你的是什麼？
就是實行公義，
心存慈悲，
謙卑及你的上帝做夥行。
9敬畏上主才是智慧。
上主對城出聲呼叫：
「逐個支族及城內的會眾，攏著聽。
10我豈會𣍐記得歹人厝內不義的錢財，
𣍐記得無合規格的升及斗？
11我豈會容允無公道的天秤，及諞人的秤錘？
12城內的好額人充滿強暴，
住民攏講白賊，
𪜶的嘴舌詭詐。
13所以我重重給你拍，
為著你的罪給你毀滅。
14你食，毋拘食𣍐飽；
腹肚不時空空。
你積聚，毋拘留𣍐牢；
你所賰的，嘛會佇戰亂中受毀壞。
15你撒種，無通收成；
掙橄欖，嘛無油通抹身軀；
踏葡萄，嘛無酒通飲。
16因為恁遵守暗利的規例，
學亞哈家的歹行為，
順趁𪜶的計謀，
所以我欲給恁毀滅，
互恁住佇遮的人受恥笑，
恁嘛會擔當我子民的見笑。」
Who We AreWhat We EelieveWhat We Do
2025 by iamachristian.org,Inc All rights reserved.
