以西結書 34 - 現代台語譯本漢字版(TTVH)-闽南语

以色列的牧者

1上主對我講：

2「人子啊，你著譴責以色列的領導者，對𪜶傳達我的信息。你著給𪜶講，我 — 至高的上主按呢講：『以色列的牧者，恁慘啊！恁干焦顧家己。牧者豈毋是著照顧羊群？

3恁食羊奶，穿羊毛的衫，刣上肥的羊來食，毋拘無欲照顧羊群。

4衰荏的，恁無給𪜶顧互勇；破病的，恁無給𪜶醫治；受傷的，恁無給𪜶包紮；失迷的，恁無給𪜶導倒來；失落的，恁無去尋。恁顛倒用強暴殘酷管轄𪜶。

5因為無牧者，羊群就四散；羊四散，就互野獸吞食。

6我的羊群佇大山小山迷路流浪，四散佇全地，無人照顧，無人去尋。

7「『所以，牧者啊，恁著聽我上主對恁講的話：

8我 — 至高的上主指家己的活命立誓，我的羊群因為無牧者，煞成做獵物，互野獸吞食。我的牧者無去尋我的羊；𪜶干焦顧家己，無照顧我的羊群。

9所以，恁諸個牧者著聽我上主的話。

10我 — 至高的上主欲及恁諸個牧者作對。我欲對恁收回我的羊群，不准恁閣做𪜶的牧者，嘛無欲互恁給家己飼甲肥肥肥。我欲救我的羊脫離恁的嘴，不准恁食𪜶的肉。』」

好牧者

11「所以，我 — 至高的上主按呢講：『我欲親身去尋我的羊，給𪜶尋倒來。

12牧者佇羊群四散的時，按怎去尋伊的羊，我嘛欲按呢尋我的羊。𪜶佇烏天暗地的日子四散去逐所在，我欲對遐給𪜶救倒來。

13我欲對萬族中給𪜶導出來，對列國召集𪜶，導𪜶轉來鄉土。我欲佇以色列眾山的溪水邊，好徛起的所在牧養𪜶。

14我欲佇好的草埔牧養𪜶；以色列的高山欲做𪜶的牧場。𪜶欲倒佇青翠的牧場，佇以色列山裡肥媠的草埔食草。

15我欲親身做我羊群的牧者，互𪜶有安歇的所在。我 — 至高的上主按呢宣布。

16「『失落的，我欲去尋；失迷的，我欲給𪜶導倒來；受傷的，我欲給𪜶包紮；破病的，我欲給𪜶醫治。毋拘許個肥閣勇的，我欲給𪜶除滅；我欲照公道牧養𪜶。』

17「講著我的羊群，我 — 至高的上主按呢講：『我欲審判逐隻羊，佇綿羊及山羊的中間主持公道。

18恁諸個佇青翠的草埔食甲肥肥的，想講這是理所當然是無？恁竟然用腳踐踏食賰的草！恁飲清的水，竟然用腳給飲賰的水撈互濁。

19豈講我其他的羊干焦會當食恁踐踏過的草，飲恁撈濁的水？

20「『所以，我 — 至高的上主按呢講：我欲親身佇恁諸個肥及瘦的羊中間主持公道。

21因為恁用腹肚邊及肩胛頭揢衰荏的，用角給𪜶觸，給𪜶趕散去別位。

22所以，我欲解救我的羊群，互𪜶無閣成做獵物；我欲佇羊及羊的中間主持公道。

23我欲設立一個牧者，就是我的僕人大闢，來給𪜶治理，給𪜶牧養。

24我上主欲做𪜶的上帝，我的僕人大闢欲做𪜶的君王。我上主按呢宣布。

25我欲及𪜶立平安的約，消滅𪜶國內兇惡的野獸，𪜶就通佇曠野安然徛起，佇樹林內歇睏。

26「『我欲賜福互𪜶，嘛賜福互我的山四周圍的地區。我欲照時落雨；福氣欲親像雨水降臨。

27田野的樹木欲結果子，土地欲出土產；我的子民欲佇家己的土地安居樂業。我摃斷𪜶背的軛，對壓迫𪜶的手給𪜶解放的時，𪜶就知我是上主。

28𪜶無閣做列國的獵物，互野獸吞食。𪜶欲安然徛起，無閣有驚惶。

29我欲給𪜶建立一個農場，互𪜶物產豐富；𪜶𣍐閣因為飢荒受害，列國𣍐閣給𪜶恥笑。

30𪜶攏欲知我上主 — 以色列的上帝及𪜶同在；𪜶是我的子民。』我 — 至高的上主按呢宣布。

31「恁是我的羊，我草場的羊；恁是我的子民，我是恁的上帝。」至高的上主按呢宣布。