雅各書 4 - 現代台語譯本漢字版(TTVH)-闽南语

毋通及世間作朋友

1恁中間的鬥爭及爭執對叨位來？豈毋是對恁肢體中間不時啲爭執及鬥爭的慾望來？

2恁想欲得著，得𣍐著，就欲刣人。恁慾望滿滿，毋拘𣍐當滿足，就爭執鬥爭。恁得𣍐著所愛的，因為無對上帝求。

3恁祈求，毋拘得𣍐著，因為恁的動機毋好，所求的干焦是欲滿足家己的快樂。

4恁諸個毋信的人啊，豈毋知及世間作朋友就是及上帝作對敵？

5聖經講：「上帝深深意愛伊囥佇咱內面的神」，恁想聖經所寫此句話無意思是無？

6不過上帝賜咱的恩典閣較大。因為按呢，聖經有講：

上帝敵對驕傲的人，

施恩互謙卑的人。

7所以，恁著順服上帝，反抗魔鬼，魔鬼就會逃走離開恁。

8著親近上帝，上帝就會親近恁。罪人啊，著洗恁的手；無定性的人啊，著潔淨恁的心。

9著悲傷，哀痛，啼哭；著互恁的快樂變做悲哀，歡喜變做憂愁。

10著佇主的面前謙卑，伊就會給恁高升。

毋通批判兄弟抑是姊妹

11兄弟姊妹，毋通互相講歹話。講兄弟姊妹的歹話，批判兄弟抑是姊妹，就是講律法的歹話，批判律法。你若批判律法就毋是律法的遵守者，是律法的批判者。

12律法的制定者及審判者只有一位，伊會拯救，嘛會毀滅。你是啥人，哪敢批判你的厝邊？

毋通誇口

13呃，恁聽我講。有人講「今仔日抑是明仔載阮欲去某一個城，佇遐住一年，做生理賺錢」。

14恁連明仔載性命會變按怎都毋知！恁假若濛霧出現一下仔久連鞭就消失。

15恁應該按呢講：「主若願意，阮就會活，通做此項做彼項。」

16恁現在敢驕傲自大；此款的驕傲攏是邪惡。

17所以，人知影著做好事，無去做就是犯罪。